Messi-a'n Inter Miami tan training a zawm

Lionel Messi chuan a club thar Inter Miami training a zawm pangngai ta a, a match hmasa ber a khelh hun tur tak erawh tihchian theih a la ni lo thung.

Messi hi Venezuela international Josef Martinez nen an inkawp tura ngaih a ni, training an neih lai pawh hian an thawk dun nghal. Nilainia US khaw lum lam hi 30C a tling - Europe nena khaikhin chuan a lum rih hle.

Inter Miami hian tun kar tawp hian Leagues Cup an khel dawn, he inelna hi MLS team leh Mexican League khel te inelna tura buatsaih a ni; Mexican club Cruz Azul nen an inkhelh hunah Messi hian bul a ṭan dawn em, tih an la sawi chiang thei lo a ni.

Club neitu zinga mi David Beckham chuan Messi hian insiamrem turin hun a mamawh a rin thu a lo sawi tawh a, hei vang hian coach Gerardo Martino pawhin a player thar hi a chhawr hmanhmawh lutuk lo mai thei.

MLS lamah chuan Messi-a'n a zawm tak Inter Miami hi Eastern Conference table mawngphah luahtu an ni a, a thiam zual pariat telna playoff khel turin chhiarkawp danin beisei la nei ve mah se an hmabak a hautak dawn hle.

Messi bakah Barcelona tana a khelhpui ṭhin Sergio Busquets an la fel tawh a, Catalan club chhuahsantu Jordi Alba pawh an la dawn. Club neitu Jorge Mas chuan Alba an lak tur thu hi a tichiang tawh.

Table mawngphah luahtu ni mah se Inter Miami hian ngaihven an hlawh dawn, chutihrualin tun season atan chuan insiamrem nghal vek a harsain a rinawm ve bawk.

European League leh MLS season hman hun a inang lo. US-ah chuan February thla chawhnu lam aṭanga league ṭanin October thla chawhnu lamah an zo ṭhin, hemi hnu hian playoff an khel leh ṭhin a ni.