Guardiola faktu Wayne Rooney

Wayne Rooney chuan Manchester City manager Pep Guardiola chu English football tana mi bik a nih thu a sawi a, thil ṭha tak tak a thlen tih a sawi chhuak bawk.

Manchester United tana goal khung hnem ber hi tunah chuan Major League Soccer (MLS) club DC United manager a ni tawh a, an ramah hna thawk rih lo mah se Pep-a hna thawh chu chiang takin a hmu thiam tho a ni.

England captain hlui Rooney chuan, "Manchester City hian thil nasa takin an tidanglam a, hmasawnna an thlen nasa hle," a ti a, mahse player a nih laia an hmelma Citizens kher an ni erawh duhthusam tikim lotu mai a nih thu a sawi bawk.

Guardiola-a'n Man City a enkawl chhungin nomawi 12 a chawi tawh, season hmasa phei kha chuan Champions League, Premier League leh FA Cup te an chawi vek - English club zingah Man United baka treble champion thei pahnihna an ni.

Rooney chan, "Guardiola hi English Football tan chuan mi pawimawh leh thil ṭha berte zinga mi a ni. EPL chauh a ni lo, a hnathawh hian England team thlengin nghawng ṭha a nei tih ka hmu.

"A player enkawl tawnhriat nei deuhte hian midang hnenah an thil ṭha hmuh chu an hrilh chhawng a ni," tiin a sawi a, an rama team ṭha tak awm chu ram team tan a hlawk tih a sawi.

Pep Guardiola hian hlawhtling takin Barcelona leh Bayern Munich a enkawl tawh a, hna a thawh tawhna Spain leh Germany te hi World Cup champion an ni thei a, an hlawhtlin theih chhanah hian Pep-a hnathawh a tel tiin a sawi ngam.

Rooney hian MLS All-Star team a enkawl dawn a, tukin dar 6:00 hian Mikel Arteta enkawl Arsenal nen an inkhel ang. Gunners tan season thar inbuatsaihna atana an match pahnihna a ni dawn.

Arteta chungchang sawiin Rooney chuan, "Arsenal tan FA Cup a chawi tawh a, season hmasa khan Premier League-ah Man City elpui ber an ni thei, coach naupangtê ni chunga a hnathawh hi a ropui hle.

"Coach hrang hrang hian tihdan phung hran kan nei vek a, coach naupang leh tawnhriat nei tlem ten thlen chak leh tih theih kan nei, heng thil hi Arteta chuan a hlen chhuak der tawh.

"Mikel pawh hi Guardiola nen an thawkdun ṭhin, kha thil khan nasa takin a pui ngei ang tih ka ring," a ti. Arteta hi inkhelh a chawlhsan hlim aṭangin Pep-a assistant atan a ṭang a, chumi hnuah a club hlui Gunners a enkawl a ni.