East Bengal-ah Sentea a khel dawn

India Under-17 captain dinhmun hial lo chelh tawh Vanlalpeka Guite chuan East Bengal a zawm a, Khawzawl rawlthar hian Kolkata club-ah hian kum thum khel turin contract a ziak.

Sentea tia hriat lar attacking midfielder chuan, "Club dang aṭang pawhin sawmna hmu mah ila, East Bengal hi an head coach hoa min duhna lantirtu an ni a, an lam hawiin thutlukna ka siam ta a ni," tiin Vanglaini a hrilh.

Asian Cup Under 17 2023-ah pawh Sentea hi India tana inlanin, hmun pawimawh a chang phak a, mahse, Blue Tigers naupang rual hian vanduaithlak takin group stage an paltlang zo lo.

East Bengal hi Bengaluru coach hlui Carles Cuadrat hnuaiah an inchher hriam mek a, kum 54 mi coach hian kum 2019 khan Indian Super League-ah Bengaluru a lo champion pui tawh nghe nghe.

Sentea hian SAFF U17 Championship 2023-ah khan India tan captain armband a hreng a, Most Valuable Player (MVP) atan thlan niin, Asian Cup-ah captain armband hreng lo mah se Indian player zinga player hmuhnawm ber pawl a la ni tho.

Chutihrual chuan Khawzawl rawlthar tan ISL club a zawm hmasak ber a nih avangin a awlsam lo ang tih a chiang a, hmun pawimawh chang nghal tura beisei chi a ni lo.