Messi kianga khel tur Jordi Alba

Barcelona-a Lionel Messi nena khel dun ṭhin Jordi Alba pawhin Messi hnung a zui ve leh ta a, Inter Miami president Jorge Mas chuan Spain defender hi contract an ziahpui thu a sawi.

Kum 34 mi full back-in Miami a zawm chungchang hi official taka puanzarna erawh he thu buatsaih a nih lai hian a la awm rih lo a, he thuziak i chhiar meuh chuan official takin an puangzar tawh hial mai thei.

Alba hian Barcelona-ah a contract hmang zoin, a duh lam club pan tura zalenna a nei a, season hman zawh takah pawh match 30 lai a la khelh avangin Miami tan a la chhawr tlak viau tura ngaih a ni.

Spain tan vawi 93 inlana goal kua khungtu Alba hian Barcelona tan kum 2012 aṭanga khel ṭanin, match 459 a inlansakah goal 27 khungin assist vawi 99 a nei a, nomawi chawi theih ang chu a chawi kim.

Alba hian La Liga nomawi ringawt pawh paruk chawiin, Copa del Rey-ah vawi nga a champion pui a, Spanish Super Cup (4), UEFA Super Cup (1), UEFA Champions League FIFA Club World Cup (1) ah te a champion bawk.

Spanish full back hian ram tan Euro 2012 leh UEFA Nations League (2022-23) nomawite a chawi a, June thla lawk khan Nations League-ah hian captain armband hreng chungin Spain a champion pui thei. Player thiam a nihna piahlamah hruaitu ṭha a nihna hi a hlu hle.

Inter Miami hian Messi bakah Sergio Busquets chu an lo lalut tawh bawk a, Alba hi MLS club-ah a mikhual dawn lo - Luis Suarez hming sawi rik a ni lehzel bawk a, Miami fan-te tan tunlai chu chanchin lawmawm hlir hriat tur a awm.

Suarez hi kum 36 mi ni tawh mah se a thiam a la theihnghilh lo. Uruguayan striker hian Brazilian club Gremio tan a khel mek a, Brazilian football season kal mekah match 31 khel tawhin goal 16 a khung leh der tawh!

Mas chuan, "Suarez hi kan hnena lokal tur anga sawi thawm a awm fo a, Gremio emaw Suarez nen emaw inbiakna direct tak chuan kan la nei hranpa rih lo.

"Suarez hian eng angin nge Gremio hi a chhuahsan theih ka hre lo a, mahse, a chhuahsan thei a nih chuan Luis bia a, Inter Miami-a hruai turin kan inpeih reng. Thil thleng thei lo tawp a ni lo," a ti a, Suarez pawh lalut thei an nih thu a sawi.

Miami hian Messi, Busquets leh Alba an tlar ta a, Suarez an lalut leh ngat a nih chuan MLS club tam tak tan chuan an tawrhhlelhawm khawp ang.