Bayern tlarhnung tiphui tur Kim Min-jae

Bayern Munich chuan Napoli aṭangin South Korean centre-back Kim Min-jae an lalut. German club hian Bundesliga nomawi chawi mah se season tawp lam an che ṭha tawk lo a, tlarhnung player ṭha an lalut hi club tan chanchin lawmawm a tling.

Bavarians hian Kim Min-Jae an lakluhna zat hi puangzar lo mah se Italian media-te tarlan danin release clause-in Napoli aṭangin an la chhuak a, euro maktaduai 50 vel tura ngaih a ni.

Kum 26 mi Kim hian nikum nipui khan Napoli a zawm a, Italian club hian hming langsar zawk Kalidou Koulibaly an chân thung. Serie A club hian thutlukna an siam fuh hle.

Kim hi September thlaah Serie A Player of the Month a ni a, season liam taa Napoli coach Luciano Spalletti chuan, "Khawvela centre back ṭha ber," ti hialin a sawi cham chi. Season tawpah Napoli-in Scudetto an chawi a, Diego Maradona hoa an champion hnua an champion lehna hmasa ber a ni a, Kim hi Serie Best Defender-ah thlan a ni bawk.

Napoli hian Kim hi chelh duh mah se release clause-ah euro maktaduai 50 chauh an dah a, chelh ngaihna a awm lo. Kim chuan, "Bayern hi footballer zawng zawng khelh châkna a ni. Bul ka ṭan dawn chauh a, hmasawn zel ka tum. Kan inbiak tirh aṭang khan min duh tih chiang takin an lantir," tiin a sawi.

Kim hian season liam ta khan league match vawi 35 a khel a, an ram South Korea tan match 49 a khel tawh bawk. South Korean defender hian Europe a pan hmain Chinese Super League-ah a khel a, kum 2021 khan Fenerbahce tan khelin kum 2022-ah Napoli tan a khel a, kum 2023-ah German champion tan a khel dawn a ni.