Wimbledon final thlirletna; Novak Djokovic chak lohna thuruk chu!
"Hetiang ang player hi ka la hmachhawn ngai lo," tiin Novak Djokovic chuan Wimbledon final an khelh zawh hnuah Carlos Alcaraz chungchang a sawi a nih kha - Serbian star hian a khingpui hi player ṭha chungchuang bik a ni tih a sawi.
Vawi sarih a champion tawhna a nih avangin Djokovic tan Wimbledon hi thil thar a ni lo, champion leh ngei tura rinkai pawh a ni, mahse tawnhriat nei lo leh grass court hmang thiam lo zawk nia lang lakah a tlawm.
Djokovic chak loh chhan hrang hrang ni thei an sawi a, mahse ama ṭhat tawk lohna lai bakah a khingpui ṭhatna chu hmuh tel ngai a ni ve bawk; kum 36 mi a ni tawh avangin a hun ṭha a liam zui ve tawh mai ang em, tih chu zawhna awm thei a ni.
Thli a thaw
Tennis player hrang hrangin ṭhat bikna lai an nei ṭhin, world number 2 Djokovic hi a ṭha kim hle a, a elpui Roger Federer leh Rafael Nadal ten ṭhat tawk lohna lai an neih ang kha a nei ve meuh lo emaw tih mai tur a ni.
Grass court-ah chuan ball a kal chak a, ball kal a ran em avang hian service nei ṭhate tan kawng a awlsam phah ṭhin. England rama khaw chin puang lawktu Met Office chuan Wimbledon final khelh hunah khan thli thaw vak lo turah an ngai.
Ruah sur loa khua a ṭhat avangin Centre Court chu a chung khuhna hman a ngai lo a, a chung lam hawn niin sawi lawk aiin thli a thaw nasa, hei hi a vannei zawk tan chuan ball vuak natpui theitu tur a ni hial.
Mahse, Djokovic-a'n ni danga a service ṭha tak angin a service thei lo. Set khatna 6-1 ngawta a lakna ngeiah pawh khan service turin thli awm dan a ngaihchan chang a tam, chair umpire Fergus Murphy khan hun vawng dik turin a tih a ngai hial a ni.
Tihsual a tam
Tennis-ah chuan a tidiktuin point an hmu a, an khingpui lamin an tihsual vangin point an hmu thei bawk. A tidiktu nih a pawimawh tluk zetin tihsual neih tlem a pawimawh hle.
Djokovic hi mahni inveng thiam tak mai a ni a, base line aṭanga ball vaw thiam a nih avangin net lamah a tlan hma tam ngai lo, hei hian tihsual a neih tlem tir ṭhin; final a luh hma match parukah unforced errors vawi 118 chiah a nei.
Match khatah a tihsual avangin a khingpuite point 11 vel chauh a pe ṭhin anga chawhrual theih a ni, mah se final bikah zet kha chuan ṭum 40 tehmeuh a tisual - Alcaraz aiin tihsual nei tlem zawk mah se match dang a khelh nena khaikhin chuan a tisual hnem mah mah.
Djokovic-a'n tihsual a ngah chhan erawh a khingpuiin ball a pek harsat thiam bakah, player dang aiin a ṭhat tawk lohna lai a hmuh thiamsak tih a chiang - Novak tan Alcaraz hi a hnawk chhunzawm ngeiin a rinawm.
Tie Break
Harsa lo angreng takin Djokovic-a'n set khatna a la a, set hnihna pawh la leh thei dinhmunah a ding. Tie break an khelh laiin 'set point' a hmu hman hial, point khat hmu zauh se set la thei a ni.
Grand Slam bikah Djokovic hian tie break a khelh hnuhnung 15-ah a chungnung vek a, a record a ṭhat chhan chu a zawna tihsual a neih tlem ṭhin vang a ni tih pawh a hriat theih.
Mahse, 4-5 a nih laia a service ṭum khat hun a khawhral rei avangin zilh a ngai a, point erawh a hmu ta tho a. Amaherawhchu, a hnu lamah ama tihsual vangin set la lotu zawkah a ṭang.
Inkhelh banah Djokovic chuan tie break an khelh laia a backhand ṭha lo chu pawi a tih thu a sawi a, ni danga a ball vuak sual ngai loh ang a vaw sual tlat chu a hriatthiam loh thu a sawi bawk.
Alcaraz a hlauhawm
Mak deuh mai chu - Alcaraz khan final a luh hma inkhel parukah khan a service hmasa a nat zawng chawhrual chu 119.8mph a ni a, nomawi inchuhna inkhelah chuan 121.3mph a ni phak.
Service vawi hnihna pawh a hma lama 101.8mph ni ṭhin kha final bikah chuan 102.5mph a tling phak ta daih a, hei hi Djokovic tan chuan buaipui tham a tling, service lo dawnsawn hi a awlsam lo a ni.
Center Court bikah kum 10 chhunga a vawi khat nan Djokovic a chak lo a ni a, season hmasa champion Djokovic tan chuan kumina chak loh hi a hrehawmin a na hle ang tih a chiang.
Djokovic hun hi a la liam maiin a rinawm bik loh a, tun season chhunga Grand Slam hnuhnung ber US Open an khel en a châkawm ta hle - September thlaah tennis hmuhnawm bik kan en leh ngei dawn e.