Chelsea dilna an hnawlsak

Brighton & Hove Albion chuan Chelsea hnen aṭangin an midfielder Moises Caicedo lei dilna an dawng - Blues hian pound maktaduai 70 bawr zet hum mah se an dilna chu hnawlsak an ni.

Ecuador international hian kumin January thla khan Brighton aṭanga chhuah dilna a lo thehlut tawh, chhuah a duh chhan hi Arsenal nen an indawr vang a ni a, mahse chhuak loin an chelh.

Kum 21 mi Caicedo hian Gunners a zawm lo mai ni loin March thla khan contract a ziak thar ta zawk; Brighton tan kum 2027 thleng daih contract a nei mek a ni.

Theihna a nei sang a, hmabak êng tak neitu a nih bawk avangin Premier League club ṭha ten an hnena khel turin an duh, tuna thawm nei lian leh che chhuak langsar erawh Chelsea an ni thung.

Season thar inbuatsaih turin Brighton hian Thawhlehni khan United States an pan tawh. Caicedo hi chawlh pek rei hret a ni a, an ram Ecuador aṭangin US-ah a ṭhiante a zawm ang.

Caicedo hian season hmasa khan Brighton chu Premier League-ah parukna a nihpui a, tun season chu Europa League an khel phak dawn - theih ni se English club hian an player ṭha hi chelh ngei an duh ang.

Chutihrualin, coach thar Mauricio Pochettino hnuaiah Chelsea hian indinthar an tum mek a, an player neih sa tam tak an chhuahtir a, an mamawh ang player lakluh an tum thung - Caicedo hi sum tam zawk nen an dawr leh a rinawm.