Match khatnaah PV Sindhu a tla

PV Sindhu tan season duhawm lo a ni chhunzawm zel, insiam ṭhat tumin beiseina sang tak nen Korea Open khel mah se a match hmasa berah Pai Yu-Po hneh loin a zinkawng a tawp nghal.

Nimina first round inkhelah Sindhu hian Chinese Taipei player hi minute 58 chhungin 18-21, 21-10, 12-21 in a ngam lo, game khat chu la ve bawk mah se a dang pahnihah a hnufual zawkah a ṭang.

Tun season kal laiah Sindhu hian nomawi chawi a la nei lo, world ranking chhuak tharah pawh 17-na a ni hial a, a sang zual 10 zinga tel phak reng ṭhin tan chuan a ranking pawh a ṭha lo ta hle.

Sindhu hian kum naupangte ni chungin Olympic medal vawi hnih a la thei a, inelna dangah pawh hlawhtlingin player hmabak nei êng berte zinga mi a ni ṭhin.

Mahse, Commonwealth Games 2022 hnu khan hliam vangin thla nga chhung ngawt a chawlh a ngai a, a hnu lamah chuan ngai a awh chhunzawm leh thei ta rih lo a ni.

Tun hnai kum 10 chhunga a ranking hniam ber ṭum a tawng ta hial, world number 17 a nih hnuhnung ber chu kum 2013 January thla daih tawh kha a ni, kum 28 mi niin insiamṭhatna hun erawh a la nei.