Leeds United-in neitu thar a nei ta

Premier League aṭanga tla hlim Leeds United chu 49ers Enterprises ta an ni ta a, Championship club hralhna hi English Football League chuan a pawmpui tawh a ni.

American football team San Francisco 49ers neitu 49ers Enterprises hian kum 2018 khan Leeds-ah hian 15% stake an lei a, kum 2021-ah 41% ah tipung chhoin, tunah chuan Andrea Radrizzani-a share zawng zawng pawh leisakin Leeds neitu pum hlum an ni ta.

Leeds chairman thar Paraag Marathe chuan, "He club-in bul a ṭan tharna turin he inthlak danglamna hi a pawimawh a ni. Tun hi Leeds tan hun pawimawh tak a ni a, rim takin hna kan thawk ṭan der tawh.

"Leeds hian season thara Premier League kai nghal turin squad ṭha tak an rem thei ang tih kan ring tlat," a ti a, theihtawp an chhuah nghal thu a sawi - Leeds nei tur hian pound maktaduai 170 an seng.

Kinnear beiseina

Championship club Leeds chuan chief executive Angus Kinnear chuan a hna ngai a chelh chhunzawm tur thu an sawi a, sumdawng hausa Rudy Cline-Thomas chu vice chairman angin board-ah hian a awm ang - Israel club ṭha Hapoel Tel Aviv Football Club neitu zingah a tel bawk.

Leeds chief executive Angus Kinnear chuan, "49ers Enterprises-in a ken tel chu hruaitu thar, inenkawlna thar leh hlawhtlinna tura ui hauh loa sum sen a ni a, heng zawng zawng hian Premier League club ni tura kan beihna kawngah min puih ka ring tlat a ni," a ti.

Kinnear chuan sawi zawmin, " Paraag, Rudy leh 49ers Enterprises-te hian he club ṭantu fan-te chu a pawimawh berah an dah reng ang, tih ka ring tlat a, he club theihna tak tak pholang tura ka thawk zel tur hi ka lawm takzet a ni," a ti a, Leeds chu hmasawnpui a tum.

Leeds Vice Chairman thar Cline-Thomas chuan, "Ka chhungte chu Leeds mi leh sa an ni a, he hmun chawisangtu zinga ka tel ve thei tur hi ka lawm hle. Ka tan chuan tun hi ka mimal tak tan pawha chona pawimawh a ni - Leeds chawisang a, khawvela player ṭha ber ber hip khawm tura din leh tura chance ka nei hi ka lawm hle," a ti.

Beiseina

Leeds-a a share zawng zawng hralhtu Radrizzani hian kum 2017 khan Leeds hi a pumin a lei a, £45mtd a seng - mahse, tuna a hralh leh meuh hi chuan club-a a share hi 56% chauh a ni tawh a, £170mtd-in a la hralh thei. Sumdawng mi tak zawng a ni phawt mai!

Radrizzani chuan, "Tun hnai kum ruk chhunga Leeds United kaihruaitu ni a, khawvela fans ṭha berte nena hun kan hmang ho thei kha ka inchhuang a ni," a ti a, a hun tawp lama amah duh lotu fan-te lawm zawng sawi a thiam hle.

Italian sumdawng hausa Radrizzani chuan sawi chhunzawmin, "49ers Enterprises hi kum rei tak chhung chu lo inhrawn tawhin, thawhpui an nuam êm êm a, Leeds hi level sang zawkah an hruai thleng ang, tih ka ring tlat," a ti.

Kum 48 mi sumdawng hausa hian Leeds a hralh hma hian Italian football lamah a sum a seng leh hman tho a, Serie A aṭanga Serie B lama tla hlim Sampdoria chu a thawhpui Matteo Manfredi nen an lei dun - football khawvel mangṭha mai a la tum lo.

Mangṭha Leeds

Radrizzani hian Leeds hi nuam a ti a, Championship lama tla hlim club hi a duh reng vanga hralh a ni bik lo. A tirah Leeds fan-te nen innel viau mah se a tawp lamah an inngur a, Radrizzani tan awm rengna chi a ni lo.

Italian sumdawng hausa hian manager Marcelo Bielsa chu Leeds-ah lalutin, Argentine coach hian rei tak an lo thlir tawh Premier League hial a kaipui a, fans tam takin Bielsa an atchilh.

Mahse, manager Marcelo Bielsa a ban hnuah Radrizzani hi fan-ten an haw ṭan a, season hman zawh taka an match hnuhnung ber kha a hmunah a en lo bawk - Tottenham Hotspur lakah tlawmin an tla chiang a, fan-ten an club chhuahsan turin Radrizzani an au bawk.

Premier League aṭanga an tlak hnuah Leeds United Supporters Club chuan thuchhuah siamin, "Radrizzani hi kan club neitu ni zel tlak a ni tawh lo," an ti a, tunah chuan an duh ang ngeiin a chhuak ta.

Beiseina neitu

Leeds hian tun nipui transfer-ah player lakluh an la nei lo - neitu thar inthlak velin club a la chim buai miau a, dem theih an ni lo. Mahse, club tam zawkin pre-season an ṭan leh der tawh avangin 49ers tan chet ran a ṭul dawn.

49ers Enterprises-te hausakna hi dollar tluklehdingawn 4.75 vel nia sawi a ni a, an duh a nih phawt chuan bazar-na tur an nei a, club neitu hmasa Radrizzani aia an hausak zawk avangin fan-ten an beisei sang ang.

Radrizzani khan dollar maktaduai 450 bawr vel a nei nia sawi a ni a, 49ers-te hausakna nen chuan khaikhin chi pawh a ni lo. BBC journalist Simon Stone chuan, "Radrizzani kha mi ngainatawm tak ni mah se, a nihna takah chuan 49ers te anga Leeds hruai turin sum a nei tawk lo a ni," a ti!

Leeds hian an pre-season match hmasa berah Manchester United chu 2-0 in an ngam lo a, season tharah Premier League-a kir an duh tak tak a nih chuan 49ers-te tan hnathawh ṭan nghal a ṭul e - player lakluh la nei lo team hian loan nena chhiar telin tun nipuiah player 14 an chhuahtir tawh thung.