Saint-Maximin-a'n Magpies chhuahsan a tum

Newcastle United-in insiamṭhat hna an thawk mek zel a, winger Allan Saint-Maximin chuan Magpies chhuahsan turin club dang nen indawrna an kalpui mek niin an sawi.

Maximin hian August 2019 khan Nice aṭangin Newcastle hi a zawm a, an player langsar pawl ni nghal mah se team dinthar turah a tel dawn lo niin a lang a, Saudi Arabia nen sawizawm a ni bawk.

Kum 26 mi forward hi Rangers nena pre-season match an khelhah pawh a inlan lo a, he inkhelah hian Magpies hian 2-1 a hnehna changin, Miguel Almiron leh Harrison Ashby ten goal an khung - Rangers striker thar Sam Lammers chuan khung ve mah se awmzia a nei phak lo.

Newcastle boss Howe chuan, "Player nen eng buaina mah kan nei lo a, he club chhuahsan tura club dang nena indawrna an neih mek avangin kan zingah a tel lo a ni.

"America-a kan tour turah pawh min zawm ka ring chiah lo. Maxi hian chhuah a duh ngawr ngawr a ni lo a, mahse, tun hi thutlukna siam hunah a ngai deuh a ni," a ti.

Howe chuan sawi zawmin, "Saint-Maximin chanchin lo sawi chiam hi ka tan a harsa angreng a, chhuah erawh min dil hran lo. Ani leh kan inkarah eng buaina mah a awm hran lo a, coach-te hian kan ngaina êm êm vek a ni.

"A chhuak a nih pawhin, ui tak chungin keini chuan kan thlah ang. Player thawhpui nuam kan tih êm êm a ni a, inkhela danglamna thlen ṭhin, thawhpui nuam tak a ni. A chhuak a nih chuan hrehawm kan ti khawp ang," a ti.

Newcastle sporting director Dan Ashworth chuan nikum khan club neitu hausa tak Saudi PIF nei thar mah se, financial fair play rule bawhchhe lo tura inhralh ṭhen an ngaih ṭhin tur thu a sawi - tunah chuan Saint-Maximin hi an hralh to theih zinga mi a ni.

Magpies hian Italy midfielder Sandro Tonali chu AC Milan aṭangin £55mtd-in tun nipuiah an lalut tawh a, Howe pawhin Saint-Maximin chu FFP dan an bawhchhiat lohna tura an hmanrua pakhat a nih thu a zep lo.

Howe chuan sawi chhunzawmin, "Maxi-te ang hi chuan duhtu tam tak a nei a ni. FFP hi thil thar, he club ka zawm hnua transfer hmasa bera rawn inchhawp, min nghawng theitu a ni, tih kan hriat nghal kha a ni.

"FFP zawm dawn chuan player hralh ṭhen ve a ngai a, tun nipuiah hi chuan ngei ngeiin kan inhralh ṭhen a ngai tawh. Saint-Maximin hi hralh ta lo pawh ni ila, pawi ka ti hran lo. Mahse, chu chu a thleng a nih chuan player thar lalut turin chhuahtir tur zawn a ngai ang - hetiang khawp hian FFP hian min nghawng a ni," a ti a, a buai hle.