Benjamin Mendy-a'n Lorient a zawm

Manchester United defender hlui Benjamin Mendy chu pawngsual thubuai aṭanga a fihlim thu court-in a puan aṭanga ni nganaah Ligue 1 club Lorient-in an lalut.

Kum 29 mi Mendy hi tun nipuiah khan City-a a contract neihlai a zo a, French club-ah hian kum hnih daih contract a ziak.

Mendy hi footballer talent nei ṭha zinga mi a ni a, ke vei lama pet niin thahrui a ngah bakah ball a pet thiam avangin hmabak a nei êng hle.

Kum 2017 khan Man City chuan Monaco aṭangin pound maktaduai 52-in an lalut a, a hun laia khawvel defender man to ber a ni. City director of football Txiki Begiristain pawhin, "Khawvela football ṭha ber zinga mi a ni," tiin a sawi.

Season hmasa berah Mendy hian City hi Premier League a chawipui nghal a, Russia-a FIFA World Cup 2018 khelh a nih ṭum khan France tan a tel.

Mahse, August 2021-a City leh Spurs an inhmachhawn hnu khan competitive football a khel tawh lo. Mendy hi hemi thla tawp lam hian pawngsual thubuai avangin man a ni a, a inkhel leh tawh lo.

Hetichung hian Loreint chuan, "World champion 2018, Premier League-a Man City vawi li champion pui thei, Ligue 1-a Monaco champion puitu kan lalut e. Benjamin, kan club-ah kan lo lawm a che," tiin chhuang takin Mendy an lakluh thu an puang.

Loreint hian pre-season friendly-ah August 5 hian Bournemouth an hmachhawn dawn a, August 13-ah champion lai Paris St-Germain nen league match hmasa ber an khel ang.