Barcelona-in Romeu an la lut

La Liga champion Barcelona chuan Southampton midfielder hlui Oriol Romeu chu Girona aṭangin an lalut a, La Masia chhuak Romeu hian kum thum daih contract a ziak.

Kum 31 mi Romeu hi Barcelona academy 'La Masia' aṭanga inzir chhuak ni mah se senior team tan 2010-11 chhung khan match hnih chauh a khel.

Barca hian Romeu an lakluhna man zat hi an puangzar lo a, chutihrualin a contract-ah hian buy-out clause euro maktaduai 400 a awm thu an tarlang thung.

Romeu hian season liam ta khan Girona tan match 33 a khel a, a club khelhna hi La Liga-ah 10-naah a awmpui. Tun nipuia Barca-in player pathum an lakna a ni a, Romeu hma hian free transfer-in Ilkay Gundogan leh Inigo Martinez te an lalut tawh a ni.

Spanish midfielder Romeu hian Barcelona aṭangin kum 2011 khan pound maktaduai 4.35-in Chelsea a zawm a, London club-ah khelhna hmun a chan ṭhat loh avangin Valencia leh Stuttgart-ah loan hmangin a chhuak.

Kum 2015 khan Southampton-in pound maktaduai ngain an lalut a, Saints tan hian match 256 khelin September 2022-ah Girona a pan. Kum hnih hnuah a inzirchhuahna Barca-ah a kir a, upat lamah hmasawn zawngin ke a penah a ngaih theih a ni.