Arsenal hmel thar tur ziarang a hriat

Premier League champion tum Arsenal chu season thara an team khelh dan tur phung a hriat ta ruak mai, an player lei thar pathum Declan Rice, Kai Havertz leh Jurrien Timber ten hmun pawimawh an chang dawn tih a hriat theih.

Tun nipui bazar chhungin English club zingah Gunners hi sum hmang hnem ber an ni a, season hmasa lama boruak rit tawng loa nuam ti taka an khelh ang ngawt kha chu a ni dawn tawh lo - pressure an nei tawh dawn, chutihrualin a hma aia team ṭha zawk an nih ngei a rinawm.

Xhaka aiah Havertz

Nilaini khan At Audi-ah player ten an thiam thil lantirna hun an hmang a, intihhlimna a nih bakah player ball pet thiam tak takte an inlan avangin mipui mit pawh a tlai ṭhin hle, an zingah huan Kai Havertz pawh a tel.

Mahse, Germany international hian 'skills challenge' an neihah hian, a sir aṭanga ball an lo pek lo dawnsawn a, chumi hnuah target a pet tur chu vawi 14 ngawt a hlah - a hlah fai vek tihna a ni; a chet dan hi social media lamah a darh zui.

A chet fuh loh aṭanga darkar 24 a liam hmain At Audi-ah bawk hian Arsenal leh Major League Soccer (MLS) All-Stars an inkhel a, hun tawp dawnah Havertz hian ball kang a dawn chu la thlain a hlap goal.

Chelsea aṭanga an lakuh hi midfield pathum chhawr zingah a tel - Blues lama a khelhpui tawh Jorginho chu midfield khaikhawmtu atan hman a ni a, ani hmaah hian Havertz awmin Gabriel Jesus puitu a ni bawk.

Mikel Arteta-a'n Granit Xhaka kha season hmasa khan tlarhma lam a puihtir nasa, ani a chhuah takah chuan Havertz hian a hmun ruak a luah ang. Arteta chuan a player thar hi a palenna chu a ṭangkai tih a sawi a, a ṭul chuan 'target man' pawh a ni thei tih a sawi bawk a ni.

Mit latu Timber

Declan Rice an lakluh thu an puan hma lawkin Arsenal-in Jurrien Timber an lak thu an puang a nih kha, anni pahnih hma hian Havertz an la fel tawh bawk - Rice leh Havertz te hming a rik rin em avangin Timber boruak hi a lang lian tawk lo.

Ajax defender hi pound maktaduai 34 man lai a ni, a tlawm lo hle. Washington khawpuia an training lai pawhin mit la ber a ni hran lo. Mahse, All Star nen an inkhelh ṭumin 'inverted midfield role' chantir a ni a, a hnehsawh em avangin sawi zui a hlawh.

Netherlands international hi a che rangin ball a thiam hle a, a pawimawh lai tak chu a inringtawk êm êm mai kha a ni. Pep Guardiola-a'n a assistant manager Arteta hnena a zirtir tactic ang tak kha Timber hian a rawn chhawp chhuak thei dawn niin a lang.

Arteta chuan, "Timber hi player themthiam leh chhawr kual theih tak mai a ni a, ball a keng theiin a ṭul a nih chuan midfield lai leh tlarhma lamah pawh a kalpui thei bawk, ball a chan laia a inringtawk êm êm kha a lawmawm.

"Ball kang chuh kawngah pawh a chuh na hle a, tharum hman a hreh lo bawk. Kan tan chuan player ṭangkai tak a ni ngei ang," tiin a sawi. Dutch defender hi 5ft 10in a sang a ni a, tlarhnung sir lamah a rintlak dawn viau niin a lang.

Rice a inlan

Hun tawp hma minute 26 la awmah Declan Rice chuan Jorginho a rawn thlak a, stadium chhunga inkhel entute thawm a ṭha hle. England international leh Italian midfielder te hi season thara hmun chan inchuh tur pawh an ni chhunzawm dawn.

West Ham captain hlui Rice hi kum 24 mi ni chungin a puitling tawk tawh a, khelmual chhunga hruaitu a nihna hi Arsenal mamawh tak a ni ang. Rice, Jorginho leh Thomas Partey te hi an khelhna hmun a inang a, chutihrualin Arteta-a'n player ṭha remkhawm dan a thiam a rinawm.

Gunners manager Arteta hian Rice an lakluh tirh khan insiamrem tur chuan hun a mamawh deuh dawna a hriat thu a lo sawi tawh - Premier League hrechiang sa ni mah se Hammers leh Gunners khelh dan a inang lo a, hun tlem chu a mamawh dawn.

Season thar inbuatsaih nan Arsenal hian July 23, Pathianni zing lam dar 2:30 hian Manchester United an hmachhawn leh dawn - Rice hian bul a ṭan lo a nih pawhin khelmual chhungah hun rei zawk a tal tawh ngei a rinawm.

Arsenal leh MSL All Star inkhel hi Partey chuan a hmunah a en thei bawk a, Ghana international pawh hian club dang zawng loin Emirates Stadium-ah a cham zui a nih chuan squad tichhah ṭha lehzualtu a ni thei dawn a ni.

Tlarhma pathum

Gabriel Jesus a dam a nih phawt chuan tlarhma laia rinrawl a ni leh dawn - Brazilian striker hian Bukayo Saka thawh rah sengin box pawn aṭangin goal mawi a khung a, goal nga an khung theih nana sulsutu pawimawh a ni.

Goal khungtu zingah tel lo mah se Saka a pawimawh, season hmasa ang bawkin mual sir lamah a hlauhawm leh dawn. Jesus khung tur a siamsak bakah hian Leandro Trossard tan a siamsak leh bawk; Belgium international hian hla tak aṭangin a pet lut nalh hle.

Gabriel Martinelli a hmuhnawm, a tlan chakna chu a hmanraw hlauhawm a ni leh dawn a, goal khung turin a 'cool' ta viau bawk, ball pass a thiam belh hunah phei chuan a hlauhawm zual ang, nikum aiin a rintlak zual tura ngaih a ni.

Martinelli, Jesus leh Saka te hi rinrawl an ni leh ngei dawn, an thachhawng dawl turin Eddie Nketiah leh Folarin Balogun te an awm. Season hmasa Ligue 1 lama goal 21 zeng khungtu Balogun hian inkhelh tam duh vanga club dang a zawng a nih erawh chuan midang an melh a ngai ang.

Player pathum an lak hnuah Arteta chuan an mamawh leh team tichak thei an hmu a nih chuan, an tan bazar hun a la zo lo tih a sawi. Spanish manager hian player thar lalut tur erawh chuan a neih sa ṭhenkhat a chhuah ṭhentir a ngaih a rinawm.