US Open khel tur Alcaraz leh Swiatek

Tennis season khat chhunga Grand Slam hnuhnung US Open a hnai a, inelna buatsaihtu United States Tennis Association chuan nimin kha player inlan tur ṭhenkhat an sawi, mipa leh hmeichhe world number 1 Carlos Alcaraz leh Iga Swiatek te chu hming langsar an ni.

Kumin US Open hi August 28 aṭanga khelh ṭan tur a ni dawn a, ruahman dan chuan September 10-ah an zo ang. New York khawpuia awm USTA Billie Jean King National Tennis Center-ah an inkhel leh mup mup dawn.

Vawi thum champion tawh Novak Djokovic pawh a inlan dawn, mahse ranking sang zawk Alcaraz chu seeded pakhatna a ni ang - Spanish star hian tun hmain New York-ah hian hlawhtlinna a lo chang ve tawh bawk.

Serbian star Djokovic hi season hmasa khan a inlan thei lo. Covid-19 hrileng laka invenna a lak duh loh avangin US-ah a zin lut thei lo a, kuminah erawh inkhuahkhirhna an thlah dul tawh avangin a inpu lut thei dawn.

US Open chauh a ni lo, tun season bikah pawh Indian Wells leh Miami Masters te pawh a khel thei lo. A tan chuan a lunglen thlak ve ngei ang, kum dang aia chet ṭhat zual a tum ngei pawhin a rinawm.

Player inlan thei lo tur zingah Rafael Nadal a langsar, Grand Slam vawi 22 champion tawh hi a khel bawr hliam vangin a chawl mek; vawi li a champion tawhna hmunah hian a inlan tawh miah lo a nih pawhin a mak lo ang.

Nadal hian season tharah tennis chawlhsan a tum thu a lo sawi chiang tawh a, chuvangin a tan engkim hi hun hnuhnung lam a ni zel tawh - a chawlh hun tur ni tak la sawi lo mah se French Open 2024 zawh hnu vel a nih a rinawm.

Hmeichhe player zingah 2021 US Open champion Emma Raducanu pawh a inlan thei dawn lo, Brirtish tleirawl hian khawvel barakhaihin US-ah hian hlawhtlinna a chang a nih kha, tunah hian a banrek leh kerek zai vangin a chawl mek.

Tun season kal laiah Australian Open, French Open leh Wimbledon te an khel tawh a, inelna hmasa pahnihah Djokovic a champion. Grass court inelna lianah erawh Alcaraz hun a inherchhuak ve thung a, a hmawr bawkna US Open hi a ngaihnawm dawn.

Djokovic hi hard court-a inkhel thiam a ni a, chutihrualin world number 1 Alcaraz tan pawh hmun ṭha a nei ve tho. Major title 23 nei tawh Novak hian a ranking leh nomawi thlenga rawn chuhpui phaktu tlangval hi tukdawl ngei a tum ang.