Hmasawn tum Mauricio Pochettino

Chelsea manager thar Mauricio Pochettino chu season thar inbuatsaih nana Wrexham an hmachhawn danah a lawm a, chutihrualin hmasawn ngaihna lai tam tak an la neih thu a sawi chhuak.

Neitu thar Todd Boehly-a'n thuneihna a chan hnuah Chelsea hi nasa takin an danglam, player lakluh nan sum tam tak an seng a, mahse result ṭha an lei tel thei si lo, an player lei khawm sa hralh chhuak lehin team thar din tumin hma an la mek a ni.

Blues hian an player thar ṭhenkhat leh player naupang zawkte chhawr tam chungin Wrexham chu 5-0 in an sawp. Ian Maatsen-a'n goal hnih khungin Conor Gallagher, Christopher Nkunku leh Ben Chilwell ten goal khat ṭheuh an khung bawk.

Chelsea manager Pochettino chuan, "Chawlh hmang an lo kir mek zel a, kan squad tichak thei tur mi thar an lo kal bawk. Inbuatsaihna la nei rei vak lo mah ila ka naute khelh dan leh an rilru puthmang khan min tilawm hle.

"A pawimawh ber chu chawlh an hman khan an inthlahdah liam mai lo tih a lang lai kha a ni, chawlh hman hnua inkhelh chhunzawm leh mai hi a harsa ṭhin, chutiang boruak chuan min tibuai loin ka hria," a ti.

Poch-a'n inkhel bul a ṭantirte kum chawhrual kha kum 19 bawr chauh a ni - Argentine manager hian a duh a nih phawt chuan season tharah rawlthar chhawr tur a nei ṭha dawn tihna a ni ang.

Rawltharte vanga a lawm thu sawiin Pochettino chuan, "Player naupang rual ṭha tak tak an awm khan min tilawm, anni hi kan tana mi ṭangkai ni chhunzawm thei tur an ni a, theihna a neih miau avangin squad-a awm turin an bei thei dawn.

"Inbuatsaihna bul kan ṭan chauh a ni a, siamrem ngai leh siamṭhat ngai tam tak a la awm. Chung zawng zawng chu hun rei lote chhungin kan siamṭha nghal vek thei lo mai thei, mahse, siam rem theih erawh a ni," tiin hmasawn an tum thu a sawi.

Chelsea hian Pathianni zing dar 4:30-ah Brighton an hmachhawn leh ang.

Player Inlan:

Chelsea starting XI (4-2-3-1): Cumming (Bergstrom 76); Gusto (Gilchrist 45), Chalobah (Cucurella 84), Humphreys, Cucurella (Chilwell 45); Andrey Santos (Hall 63), Casadei (booked), Chukwuemeka (Gallagher 45), Moreira (Angelo 45), Jackson (Nkunku 45), Maatsen (Sterling 45).

Wrexham starting XI (3-5-2): Foster (Lainton 45), O'Connell (Hayden 45), Tozer (Cleworth 62), O'Connor (Boyle 45); Forde (Barnett 45), Jones (Young 62), Cannon (McAlinden 62), Lee (Davies 62), Mendy (McFadzean 45); Dalby (Waters 62), Mullin (Palmer 62)