National Junior C'ship fixtures a chhuak

All India Football Federation (AIFF) chuan Hero Junior Boys' National Football Championship for Dr BC Roy Trophy 2023-24 leh Hero Junior Girls' National Football Championship 2023-24 fixtures a ti chhuak.

Inelna hi September thla hian Bhubaneswar, Odisha-ah neih a ni ang. Mipa inelnaah Mizoram chu group A-ah Karnataka, Jharkhand leh Maharashtra te nen an awm. Match hmasa ber hi September 5-ah khelh a ni ang a, Mizoram hian Jharkhand an hmachhawn ang. Hemi zawh hian Maharashtra (September 7) leh Karnataka (September 9) te an hmachhawn leh dawn.

Inelnaah hian team 16 telin group paliah pali zela ṭhen an ni a, group tin aṭangin a sang berin semifinal an lut dawn. Semifinal hi September 13-ah khelh tur a ni a, final hi September 15-a khelh tura ruahman a ni.

Hmeichhe inelnaah hian Mizoram hi group C-ah Bihar, West Bengal leh Jharkhand te nen an awm ve bawk. Mizoram hian Bihar (September 20), West Bengal (September 22) leh Jharkhand (September 24) te an hmachhawn ang. Semifinal hi September 28 a khelh tur a ni a, final hi September 30-a khelh tur a ni.