Liverpool captain 're-union' - Hendo a chhuak dawn!

Season thara Cham-pions League khel lo tur Liverpool fan-ten transfer bazar-ah thawm duhawm an neih hnu lawkin chanchin hriat nuam lo an nei zui a, Saudi Arabia lamah Reds Captain re-union a awm dawn.

Liverpool captain Jordan Henderson chuan Reds captain hlui Steven Gerrard-a enkawl Al-Ettifaq a zawm dawn a, Saudi Pro League club hian English midfielder manah hian pound maktaduai 12 an theh chhuak dawn - a khelh ṭhat dan a zira la tihpun leh tur niin, a thuphungin an inrem tawh.

Kum 33 mi Hendo hian Reds-ah kum hnih cham turin contract a la nei a, mahse, Saudi Arabia lam aṭanga sawmna a mawm ṭha a, England international player a nihna meuh pawh thap ngamin Hendo a chhuak dawn.

Liverpool midfielder Fabinho chu Saudi lam pan thei dinhmunah a ding mek a, Al-Ittihad chuan Brazil international hi Reds aṭanga pound maktaduai 40 senga an lakchhuah theih an inbeisei a ni.

Sum vang?

Jurgen Klopp-a enkawl Liverpool captain a ni a, player-ten an zah êm êm vek bawk - season hman zawh takah Liverpool-in beisei phak lo mah se, Klopp-a enkawl Liverpool hi an indinthar leh ang tihah rinhlelh tur a awm lo.

Hei chauh a ni lo - Hendo hi England coach Gareth Southgate-a'n a duhsak êm êm bawk nia sawi a ni a, Saudi Pro League club tana khel hi Three Lions tana khel tura koh reng a harsa dawn.

A tawi zawnga sawi chuan Hendo hian a career ropui tak a mangṭha dawn tihna a ni a, tam tak tehna aṭang chuan a thutlukna hi âtthlak ti hiala sawi ngam a ni. Mahse, Hendo hi pawngtawng dem ngawt erawh a fuh bik lo ang.

Al-Ettifaq manager Steven Gerrard hi Liverpool tana a khelhpui ṭhin a nih avangin Saudi a pan hreh loh chhanah a sawi theih a, thil chiangsa pakhat erawh sum a ni. Hendo hian Reds-ah hian kar khatah £190,000 a hlawh nia sawi a ni a, Saudi club-ah hian kar khatah £700,000 a hlawh dawn - an ti!

A ni lo deuh

Hendo hlawh tur zat thlir hian Saudi a pan chhan a lang chiang a, chutihrual chuan hemi phenah hian a chhan sawi tur tam tak a awm ve tho - sum vang a ni, tia 100% a ṭan tiharsatu a ni.

Henderson hian a tirah tak chuan chhungkuaa Saudi Arabia-a pem hi a châk lo niin an sawi a, hei vang hian Al-Ettifaq hi zawm a tum lo. Mahse, Saudi club hian Steven Gerrard an inngaihtuah nawntir ang chiahin Hendo hi hun an pe a, English midfielder hian zawm turin thutlukna a siam ta.

Liverpool tan match 492 khel a, goal 33 leh assist vawi 57 neitu Hendo hian Saudi club zawm tura thutlukna a siam hma hian Jurgen Klopp a titipui thlap a, first team-a a dinhmun thlenga an sawi dun hnuin thutlukna hi a siam.

Reds manager Jurgen Klopp chuan, "Thutlukna engmah siam a la ni lo a, tun dinhmunah chuan sawi tur ka nei rih lo. A tawpa thutlukna siamtu chu keimah ka ni a, player-te ka zah em avangin an duhthlanna ka ngaithla hmasa ṭhin. Tunah pawh hian chutiang tho chu a ni a, ka hrethiam êm êm a ni," a ti.

I liam dawn maw

Hendo hian Liverpool captain armband hreng chungin, Premier League, Champions League, UEFA Super Cup, FIFA Club World Cup, FA Cup leh League Cup-ah te champion nomawi a chawi a, a tawnhriat ringawt pawh hi a ropui hle.

Player thiam bik tia sawi tur ni lo mah se player huaisen bik, rilru paukhauh bik, tia sawi theih a ni a, a thiamna piah lamah a khelhpuite chawk phur thei a nihna chu a hlutna a ni.

Hendo chhuah hunah Liverpool tan tuin nge captain armband hreng ang, tih chu zawhna langsar a ni nghal a, a tel loin Liverpool hian khelmual chhungah hotu an nei thei ang em, tih pawh rilruah a awm.

Hming langsar ber chu Virgil van Dijk a ni a, Dutch defender hian captain armband a hren mai a rinawm. Andy Robertson, Trent Alexander-Arnold leh Alisson Becker te pawh hi armband hreng thei zinga mi an ni.

Fabinho pawh

Liverpool hian Hendo chauh an chân dawn lo. Brazilian midfielder Fabinho pawhin Saudi Arabian club Al-Ittihad aṭangin sawmna a hmu a, £40mtd ngawt sen an inhuam avangin a chhuah ngei a rinawm.

Kar hmsa Zirtawpni zan khan Liverpool hian Al-Ittihad dawrna hi an dawng tawh a, Fabinho hian pre-season tour neia zin chhuak Liverpool squad pawh a zawm ve lo - a chhuak ngei dawn niin a lang.

Brazilian midfielder hian July 2018 khan Reds hi a zawm a, AS Monaco aṭanga an lakluh player man hi £39mtd a ni - Liverpool a zawm hnuah Premier League, Champions League, FA Cup, League Cup leh FIFA Club World Cup nomawi a chawi tawh.

Kum 29 mi chauh a la nih avangin Fabinho hian career thui tak a la nei a, Al-Ittihad hian a man piahlamah a thla khat hlawh tur pawh an inseng huai viauin a rinawm.

Squad thar

Reds hian Hendo leh Fabinho an chhuahtir chuan engtiangin nge an inrem ang, tih chu zawhna awm thei a ni a, tun season-ah Brighton & Hove Albion midfielder ṭha mi Alexis Mac Allister leh RB Leipzig duhlai Dominik Szoboszlai lei tawh mah se player chhuak zat ngaihtuahin inlei belh fe an la ngai.

Mac Allister hian number 10 hain, Szoboszlai hian number 8 a ha a, hei hian Reds player lak tharte pawimawh turzia a hrilhfiah. Mahse, Liverpool hian nipui transfer-ah Roberto Firmino, Naby Keïta, James Milner leh Alex Oxlade-Chamberlain te an chhuah tawh a, Hendo leh Fabinho an chhuak leh dawn.

Player chhuak en ila, an hmun ruak hnawhkhah a harsa ang tih a chiang a, Klopp-a tan squad thuamchhah piahlamah a kaw lai hnawhkhah a ṭul. Reds hian pre-season tour-a an match hmasa berah Karlsruher SC chu 4-2 in an hneh.

Liverpool tan Diogo Jota chuan goal hnih khungin, Darwin Núñez leh Cody Gakpo ten goal khat ve ve an khung bawk a, German second division club tana Lars Stindl leh Sebastian Jung goal khungin awmzia a nei phak lo.

Liverpool thar?

Jurgen Klopp-a'n Liverpool-ah 4-3-3 formation a hlawhtlinpui a, pre-season-a an match hmasa berah pawh he formation tho hi hmangin, Klopp hian a neih ṭhat dan angin a tem a rem - a enchhin ṭan der niin a lang.

Reds tan hian Virgil van Dijk, Trent Alexander-Arnold, Ibrahima Konaté, Luis Díaz, Darwin Nunez, Mohamed Salah leh Szoboszlai te chuan bul an ṭan vek a, Mac Allister, Cody Gakpo leh Diogo Jota te chu bench aṭangin an lut bawk.

Hetihrual hian Fabinho tel lo chuan Liverpool hian number 6 ṭha tak tia sawi tur an nei lo tih a lang a, Brazilian midfielder hi a chhuak a nih chuan Klopp-a tan a hmun ruak luah tur zawn a fuh ang. Hetihlai hian Luis Diaz leh Thiago Alcântara pawh Saudi club nen sawizawm an ni a, Reds hian Diaz erawh a chhuah an phal dawn lo niin an sawi.

Germany-a zin mek Liverpool hian second division club Greuther Fürth chu July 24 hian an hmachhawn leh dawn a, Singapore-ah Leicester City leh Bayern Munich hmachhawn zuiin, England-ah Darmstadt 98 nen intawngin pre-season inbuatsaihna an zo ang.