Marseille zawm tur Auba

Chelsea forward Pierre-Emerick Auba-meyang chuan Marseille zawm turin thutlukna a siam a, Arsenal striker chhuanvawr ni ṭhin hian Stamford Bridge-a a mangchhia chu ngai lo takin a thlah dawn ta.

Kum 34 mi striker hian nikum September khan pound maktaduai 10.3-in Chelsea hi Barcelona aṭangin a pan a, hetihlaia amah laluttu chu Borussia Dortmund lama a pu hlui Thomas Tuchel a ni.

Mahse, German coach hi Auba-a'n Chelsea a pan hnu lawkah ban a ni a, Tuchel thlaktu Graham Potter-a'n Gabon striker hi Champions League squad-ah pawh telh loin, tlarhmaa khel turin striker pangngai pawh ni lo Kai Havertz a thlang zawk ṭhin.

April-a Potter ban a nih hnuah coach lailawk Frank Lampard chuan Auba tan kawng a hawnsak a, mahse, Arsenal tana hlawhtling taka lo khel tawh striker hian a thawnthu hlui kha a chhawm nung thei lo.

Blues tan hian inelna hrang hrangah match 22 khelin goal thum chiah a khung a, thla 12 ngawt London club-a cham turin contract la nei mah se a chhuak dawn ta zawk a ni.

Chelsea hian USA-ah pre-season tour nei mekin, an squad-ah hian Auba hi a tel lo a, ani bakah hian chhuak tur anga sawi Romelu Lukaku, Hakim Ziyech leh Callum Odson-Odoi te chu squad-ah hian an tel lo bawk.

Coach thar Mauricio Pochettino hnuaia intuaihriam tum mek Blues hian nipui transfer-ah player langsar an chhuahtir nual a, defender Kalidou Koulibaly, midfielder Mateo Kovacic, goalkeeper Édouard Mendy, forward Kai Havertz, midfielder Ruben Loftus-Cheek, Tiémoué Bakayoko, N'Golo Kanté, Mason Mount, captain César Azpilicueta, full back Baba Rahman, attacking midfielder Christian Pulisic leh centre back Ethan Ampadu te an chhuahtir tawh.