Saudi Arabia-a pem tur City player Riyad Mahrez

Manchester City tana treble nomawi a chawi zawh hnu lawkah Riyad Mahrez pawh Saudi Pro League lam pan turin a puanthuah a tel a, City chuan an player hi Saudi club Al-Ahli hnenah pound maktaduai 30-a hralh an rem ti.

Champions League, Premier League leh FA Cup champion City hian pre-season tour chu Japan leh South Korea-ah an hmang mek a, Algerian forward hi a hma hun a tihfel hma theih nan tour-ah pawh hian an hruai ve lo a ni.

Mahrez hian City-a cham turin kum hnih contract a la nei a, mahse, kum 32 mi a nih ve tawh avangin City tan a la hlut theih laia hralh hi thil tihawm lo a ni hran lo.

Kum 2018 khan Mahrez hian Leicester City aṭangin Manchester khaw club hi a zawm a, hetihlai hian £60mtd man a ni - City tan Champions League, Premier League (4), FA Cup (2), League Cup (3) leh FA Community Shield a chawi bawk.

Mahrez hian City tan match 236 khela goal 78 khungin, assist vawi 59 a nei a, season hman zawh takah khan inelna hrang hrangah match 47 khela goal 15 khungin, assist vawi 13 a nei.

Mahse, Champions League leh FA Cup final-ah Mahrez hi bench-ah a ṭhu tluan a, a hun tam zawk bench-ah a hman ṭhin avangin sum tamna Saudi lam a pan dawn ta niin a lang.

Mahrez hian Saudi club-ah hian kum khatah pound maktaduai 25 vel a hlawh dawn nia sawi a ni a, City-ah hian kum khatah pound maktaduai riat vel a hlawh nia sawi a ni - a hlawh punna hi a tam tham hle.

City hian tun nipui transfer-ah player an chhuahtir nual dawn nia sawi a ni a, England defender Kyle Walker pawh Bayern Munich nen sawizawm an ni mek - German media ṭhenkhat chuan an inrem tawh ang hialin an puang zar a, hei erawh thudik tawk lo a ni.

Walker bakah hian Portugal midfielder Bernardo Silva leh Spain defender Aymeric Laporte te chu chhuak tur anga sawi an ni bawk a, hetihlai hian Portugal full back Joao Cancelo erawh loan-a hawhtu Bayern-in a ngheta lakluh an tum loh avangin City-ah a kir thung - tour-ah hian squad-ah a tel.

Asia-a pre-season tour-ah hian goalkeeper Zach Steffen chu khup hliam vangin a zin ve lo a, USA international hi City chuan tun nipuia chhuahtir an pawiti lo nia sawi a ni.