Hmeichhe World Cup-ah a thlengtu New Zealand an chak

FIFA Women's World Cup 2023 chu nimin khan khelh ṭan a ni a, inkhel hmasa berah inelna thlengtu New Zealand chuan 1-0 in Norway an hneh a, Hannah Wilkinson chuan inkhela goal awmchhun a khung.

Eden Park-a fans 42,137 hmaah New Zealand hian an goal hnihna khungna chance pawh an nei a, mahse, Even Ria Percival chuan minute 89-naah penalty hi a hlah - an ram chanchina a vawi khat nan World Cup-ah an chak a, he inkhel hi New Zealand-a football entu an tam ber record a ni nghal bawk.

Hmeichhe football-a ram langsar ni phak Norway tan Frida Maanum chuan goal khungna remchang nei mah se a chhawr lo a, a tawpah chuan inelna thlengtu New Zealand-in hnehna an chang.

Nimina New Zealand-a World Cup match hmasa ber khelh a nih hma hian Auckland khawpuiah chhiatna a thleng a, silai hmeh puah niin mi pahnih an thi a, mi paruk inhliamin, silai hmet puaktu pawh hi a thi.

New Zealand prime minister Chris Hipkins chuan thil thleng chu firfiak chetna nia an hriat loh thu a sawi a, he thu buatsaih a nih lai hian a chhan tak an la hre lo bawk. Auckland mayor Wayne Brown chuan thil thleng chuan World Cup nen inkungkaihna a neih loh thu a sawi.

FIFA Women's World Cup 2023 hi New Zealand leh Australia ten an inthlen ṭawm niin, Australia pawh hi match hnihnaah an inlan ve nghal a, Republic of Ireland chu 1-0 in an hneh.

Hmeichhe World Cup-ah hian vawiinah inkhel pathum a awm lehnghal ang.

July 20, Ningani Zan
New Zealand 1 - 0 Norway
NEW: Hannah Wilkinson 48'
Australia 1 - 0 Republic of Ireland
AUS: Stephanie Catley 52' (P)

July 21, Zirtawpni Zan
Nigeria 8:00 AM Canada
Philippines 10:30 AM Switzerland
Spain 01:00 PM Costa Rica
*Inkhel hi DD Sports-ah en theih a ni a, online-a en duh tan fancode lamah a en theih bawk.