Man United nen hian UCL champion theih ka beisei - Onana

Manchester United chuan Inter Milan aṭangin Andre Onana an lalut fel a, Cameroonian keeper nimin khan a teammate-te zawm turin New York a pan.

Nilaini khan Onana hian Carrington-ah medical test a nei a, lehkha pawimawh a ziak fel nghal. Nimin lam khan club lamin inremna an tifel ve bawk. He thu i chhiar meuh chuan Man United-in an keeper thar Onana hi an puangzar tawh ang.

Kum 27 mi Onana hian kum nga daih contract a ziak a, kum khat pawhsei theih dan a awm bawk.

Manto pathumna

Khawvela keeper manto ber chu Kepa Arrizabalaga a la ni reng a, Spanish keeper hian kum 2018 khan Athletic Bilbao aṭangin Chelsea chu pound maktaduai 71.6-in a zawm.

Hemi kum vek hian Alisson-a'n Roma aṭangin pound maktaduai 67-in Liverpool a zawm ve bawk. Man United-in Andre Onana an lakluhna hi pound maktaduai 47.2-a ngaih a ni a, goalkeeper manto pathumna a ni ang.

Goalkeeper manto dangte chu Thibaut Courtois (£35m), Ederson (£34.7m) leh Gianluigi Buffon (£32.6m) te an ni a, United-in Onana an lakluh hma keeper manto panga zingah Onana chauhin a man a phu lo.

Tumna a sang

Manchester United keeper thar Onana-a'n Champoins League nomawi lak a châk thu a sawi nghal. Ajax goalkeeper hlui Onana chuan, "Man United nen hian UCL champion theih ka beisei," tiin a sawi a, season liam ta khan UCL final-ah Man City hneh loin Inter Milan pahnihna a nihpui.

Man United hian nipui bazarah Mason Mount an lalut a, Chelsea aṭanga an lakluh English midfielder hian friendly match vawi hnih khelh tawhah beisei a la pha tawk lo.

Tunah David de Gea thlak nan Onana an lalut fel leh a, striker ṭha lakluh an tum dawn. Man United nena sawizawm striker chu Rasmus Hojlund a ni a, Danish striker chungchangah hian Atalanta phalna zat leh Man United ngamna zat a la inhlat deuh.

Engtin zel?

Onana hi Man United leh Arsenal inkhelh hunah inlan hman thei tura ngai an awm. Chutihrualin Onana hi inlan hman lo mah se United hian keeper dang pali Nathan Bishop, Tom Heaton, Dean Henderson leh Radek Vitek te US-ah an hian an hruai.

Lyon an hmachhawn ṭumin Matej Kovar a che ṭha viau bawk. Kovar hian pre season match hnih aṭangin 94.15 pass accuracy a nei pha a, Czech keeper hian a ke hmang thiam viau mah se senior team-a tel phak a la a harsat ang.