Match ruk khelh hmabak

Manchester United-in Premier League match hmasa berah Wolverhampton Wanderers an hmachhawn dawn a, August 15 hian Old Trafford-ah an mikhual ang.

League match hmasa ber khelh hma hian friendly match paruk an la khel dawn. July 22, Inrinni zan dar 2:30 hian Arsenal nen MetLife Stadium, New York-ah an inkhel dawn a, friendly match a ni nachungin football ngainatuten en châk tur tak a ni ang.

July 26, Nilaini zing dar 8:00-ah Wrexham nen Snapdragon Stadium, San Diego-ah an inkhel dawn. Wrexham hi League Two club ni mah se club neitute hi lemchan thiam lar Ryan Reynolds leh Rob McElhenney te an ni a, khelmual pawnah boruak an nei ṭha. League Two club ni chung siin US Tour-ah pawh Man United an hmachhawn hma hian Chelsea nen an inkhel tawh a ni.

Man United hian Europe-a sulhnu nei ṭha ber club Real Madrid an hmachhawn dawn bawk a, July 27 zing dar 6:00 hian NRG Stadium, Texas-ah an inkhel ang. Toni Kroos chuan, "US-ah kher chuan Real Madrid leh Man United aia ṭantu ngah hi an awm kher lo ang. Hei vang hian inkhel boruak pawh a nawm viau ka ring," tiin a sawi.

Erik ten Hag-a hote hian July 31, Thawhṭanni hian Borussia Dortmund nen Allegiant Stadium, Nevada-ah an inkhel leh ang a, US Tour an khar ang.

Friendly match erawh an la neih chhunzawm dawn. August 5, Inrinni tlai dar 5:15-ah RC Lens an mikhual ang. Aviva Stadium, Dublin-ah Athletic Bilbao nen August 6, Pathianni hian friendly match hnuhnung ber an khel ang.