Van de Beek hmalam hun a chiang lo

Manchester United chuan Nilaini zan khan Murrayfield Stadium, Edinburgh-ah Lyon 1-0 in an hneh a, friendly match-a goal awmchhun hi Donny van de Beek-a'n minute 49-naa a khung a ni.

Dutch midfielder hi second half-ah a lut a, amah ang bawka bench aṭanga lut Daniel Gore-a'n cross chu a kang laiin mawi zetin a volley goal. Van de Beek hian goal hmangin a theihna a lantir a, Erik Ten Hag-a'n a ring zui ang em tih erawh hriat a ni lo thung.

September 2020 khan Van de Beek hian beiseina sang tak nen pound maktaduai 35-in Ajax aṭangin Man United hi a zawm a, beisei erawh a pha chhunzawm lo. Chutihrualin tuna manager Ten Hag hi Ajax manager hlui a ni a; Christian Eriksen, Lisandro Martínez, Antony leh an lak tur Andre Onana te hi Ajax tana hming chher vek an ni.

Kum 26 mi Van de Beek chuan, "Ka hmalam hun hi sawi thiam a harsa. Ka inhliam hnuah ka rawn kir chauh a, kar rei lote chhung ka training hnuah club tana match hmasa ber ka khel. Ka fitness a ṭha, hmasawn zel erawh ka tum. Thil thleng thei tam tak a awm a, chhuak thei pawh ka ni," tiin a sawi.

Dutch midfielder hi Man Untied a khelh phak loh avangin kum 2022 khan loan hmangin Everton a zawm a, season liam ta tawp lam kha khup hliam vangin a khel thei lo bawk.