Ni 2865 hnuah United tan Evans a inlan

Manchester United-in an player hlui Jonny Evans chu friendly match hnih khel turin contract a ziahpui a, Northern Ireland international defender hi Nilaini zana Lyon 1-0 a an hneh ṭumin second half pum a inlan.

September 15, 2015 kha Evans-a'n Old Trafford a chhuahsan hmaa Man United kawr a hak hnuhnung ber a ni a; July 19, Nilaini khan inlan lehin ni 2865-na chiah a ni.

Kum 35 mi Evans hi US-a zin tur squad puan zingah tel chiah lo mah se San Diego-a Wrexham hmachhawn tur zingah a tel dawn. Evans hian academy player rualin San Diego a pan thung.

Erik ten Hag chuan, "Tawnhriat nei ṭha player a nei a, a rilru put hmang a entawn tlak bawk. A theihna sang tak hi naupang zawkte tan inzirna tur ṭha tak a ni ang," tiin a fak a, Lyon lakah pawh Evans hi a khel ṭha thawkhat.