UFC 247: Record thar siamtu Jon Jones a chak

Jon 'Bones' Jones chuan Dominick Reyes hnehin UFC light heavyweight kawnghren a kawl lai chu a humhim a, title fight-a vawi 14 hnehna a channa chiah niin record thar a siam - UFC title fight-ah ani anga chak hnem an la awm ngai lo. 

Nimin zinga neih UFC 247-ah hian kum 32 mi Jones hi unanimous decision (48-47, 48-47 & 49-46)-a chakah puan a ni a, Toyota Center, Houston-a entu mipui zingah result lawm dan a inang lo hle. 

Fans ṭhenkhatin result hi an 'boo' khum hluah hluah a, ṭhenkhatin an lawm thung. Jones chuan result 'fair' tak a nih thu sawiin, "Hna awlsam a ni lo a, awlsam tak ni se vawiina kan fight entu tam tak hian inti thei ang. 

"Thil harsa leh awlai lo tak chu ka puitlin ta. Dominick kha a palian a, a sang a, a chak a, coaching a kal ṭha tih a hriat em em bawk. Ka beisei aiin a 

ṭha a, a hmaa ding apiang deuhthaw hnehtu a ni a, ka hmaa din kha a phu hle a ni," a ti!

Kum 30 mi Dominick Reyes tan fight vawi 13 a hmachhawna a vawi khat tlawmna a ni a, American fighter chuan, "He fight hi ka nihna tak pholangtu a ni a, tun ai hian ka rawn ṭha lehzual ang," tiin a sawi. 

Round nga chhung fight hmuhnawmah hian Reyes chuan round 1-3 inkar rorela a inhriat thu a sawi a, "Round 1-3 inkar zawng kha chu hnehna ka changah ka ngai a ni," a ti a, Jones chuan, "Fight ropui tak a ni a, Dominick ka chhuang takzet che a ni," tiin a hmachhawn fighter hi a fak thung.