Hungary GP an tlan dawn

Pathianni zan dar 6:30 hian Formula 1 Hungarian Grand Prix tlan a ni dawn a, driver championship lama hmahruaitu Max Verstappen leh sulhnu nei ṭha Lewis Hamilton te chuan inelna hmuhnawm an chhawp chhuak ngeiin a rinawm.

Red Bull driver Vertasppen hian season hmasa khan sawi hlawh takin Hungary-ah hian hnehna a chang a, ṭum riat ngawt a chak tawhna hmunah Hamilton chu a vanduai zawkah a ṭang a, pahnihnaah a thleng.

Mercedes driver Hamilton tan Hungaroring tlankawng hi hmun ṭha a ni ṭhin a, ani aia chak hem an awm lo; kuminah pawh a duh ang takin season hmang ṭha lo mah se tun ṭumah chuan dah hniam theih a ni dawn bik lo.

Tun season intlansiak vawi 10 an neih tawh chinah Red Bull driver pahnih ten pakhatna dinhmun an insem, team dangin hnehna an la chang ve miah lo tihna a ni. Vawi riat chak tawh Verstappen chuan hma a hruai fal hle.

A zawna F1 title vawi hnih la tawh hi tun ṭumah pawh hian rinkai ber a ni dawn, chutihrualin Hamilton-a'n tun hnaiah hma a rawn dawn a, 4.381 km a thui tlankawngah ṭum 70 an tlan kual dawn a ni a, an vaia an tlan tur belhkhawm hi 306.630 km a tling - a hmuhnawm leh dawn.

F1 season a kal mek a, a chanve pawh an la zawh hmain season thar tur calendar an ti chhuak leh der tawh - ruahman dan chuan nakkum March thla aṭanga December thla chhungin intlansiak 24 awm tura tih a ni.

Driver tam tak chuan intlansiak hi a tam mah mah niah an ngai a, car intlansiakna sang bera thuneitu lam erawhin khawvel huap a nih avangin a tam thei ang leh a darh zau thei ang bera inelna neih chu an thupui a ni thung.

Dutch tlangval Verstappen chuan, "Ka tan chuan vawi 24 intlansiak chu a tam lutuk, mahse a hmachhawn dan kan thiam mai a ngai dawn. Mimal ngaihdan chauha thil kalpui theih a ni lo a, kan zavai huapa thil tih a ngai zawk.

"Ka rilruah thil tam tak a lo lut, engtiang chena rei nge ka awm theih ang tih pawh ngaihtuah tel ngai a ni. Ngun taka ka ngaihtuah chuan, ka tan chuan intlansiak tam lutuk hi chuan ṭhatna aiin ṭhat lohna a thlen zawk ka ring," a ti a, media ṭhenkhat chuan rei tlak a tel loh mai an hlauh thu an ziak a ni.

Kum 25 mi Verstappen hian Red Bull tan kum 2028 thleng daih contarct a nei mek a, a hnu lama a awm zel dan tur chu sawi theih a la ni lo. Car intlansiakna sang berah hian 2015 aṭang khan a tel ṭan a, intlansiak vawi 172 a hmachhawn tawh.

Tun season kal laiah chuan Verstappen-a'n a teammate Sergio Perez lakah point 81 zetin hma a hruai fal mek, a chesual viau a nih ngawt loh chuan a zawna a vawi thum nan F1 title a lak leh ngei hmel a ni.