Insiamthar a ngai - PV Sindhu

Olympic medal vawi hnih la tawh PV Sindhu chuan season a hman ṭhat loh chu siamṭhat thuai a duh a, tournament a khelh hmabak Japan Open-ah chuan result ṭha neih ngei a duh tih a sawi.

July 25-30 chhung hian Tokyo khawpuia awm Yoyogi National Gymnasium-ah Japan Open hi an khel dawn - Sindhu bakah Indian badminton khel thiamte chu an inlan leh ang.

Kum 28 mi Sindhu chuan, "Ka tan chuan kum ṭha lo tak chu a ni, chutihrualin beisei erawh ka la nei reng. US Open aṭanga ka tlak hnu khan Korea Open ka khel leh a, beisei ka phak ta chuang lo.

"Japan Open kan khelh hunah chuan result ṭha neih ngei ka beisei, ka chet fuh tawk loh lai pawhin thlawpna ka dawng ṭha em em a, tawpchin nei loa min ṭantute chungah lawmthu ka sawi," a ti.