US-ah Arsenal vs Man United

Mikael Arteta hnuaia indinthar Arsenal chuan zanin (Pathianni zing) dar 2:30 hian Erik ten Hag-a hnuaia insiamṭha mek Manchester United an hmachhawn dawn. Premier League club lian pahnih hian MetLife Stadium, New Jersey-ah friendly match hi an khel ang.

Arsenal hian US-ah bul an ṭan ṭha a, MLS All-Stars chu 5-0 zetin an sawp. Red Devils pawhin friendly match ṭum hnih an nei tawh a, Leeds United (2-0) leh Lyon (1-0) te hneh tawhin goal an la chhuah lo.

Premier League-ah chuan club inhal pahnih hi September 3, Pathianniah khelh a ni dawn a, hei hi en châkawm zawk ni mah se zanina an inkhel tur pawh hi player thar enchhina a nih dawn avangin club ṭantu ruhkawl ho tan chuan hmaih phal chi a ni lo ang.

Arsenal-in MLS All-Stars hmaah 'star' an nihzia an lantir ṭumin player thar Declan Rice, Jurrien Timber leh Kai Havertz te an luhtir. Havertz hian goal a khung nghe nghe.

Chutihrualin Gunners tan season liam taa rinawl Bukayo Saka, Gabriel Jesus leh Gabriel Martinelli te an la rintlak viau bawk. Man United erawh friendly match hmasa pahnihah star player tam zawk an kim lo a, Lyon laka goal khungtu pawh Donny van de Beek a ni.

Captain thar Bruno Fernandes-a'n team a ho nghal rin a ni a, keeper thar Andre Onana pawh khel thei dinhmunah a ding. Season liam taa Chelsea player Havertz, Jorginho leh Mason Mount te an inhmu khawm dawn a, an kawr hak erawh a inang tawh lo ang.