Manchester United captain thar Fernandes

Manchester United chuan captain atan Bruno Fernandes an tichiang. Pathianni khan Harry Maguire chuan captain nihna hlihsak a nih thu a sawi a, Ningani khan club-in captain nghet atan Fernandes an puang.

Ole Gunnar Solkjaer-a'n January 2020 khan nipui bazara an lakluh Maguire chu captain nghet atan a ruat a, England international defender hi Old Trafford-ah hun a la hman rei loh avangin dressing room-ah captain atana pawm lo an awm.

Khelmual chhungah Maguire a chet ṭhat loh avangin Erik ten Hag-a hnuaiah English defender hian captain hna chelh chhunzawm mah se khelhna hmun a chang tam tawk lo. Raphael Varane leh Lisandro Martínez te defence laiah an inkawp a, pakhat zawk an inhliamin Victor Lindelof a lut. Hei chauh hi a ni lo a, left back Luke Shaw chu defence laiah chhawr a ni bawk.

Maguire hi Ten Hag hnuaiah a pawimawh tawk lo. Season liam ta khan Premier League match 29-ah Fernandes hi a captain. Hei vang hian captain nghet atan pawh Fernandes hi rin sa a ni.

Portuguese midfielder Fernandes hian khelmual chhung leh pawnah Ten Hag-a mit a tlung pha a, season li lai Man United tana a khelh tawh avangin club chhung a hrechiang viau tawh bawk.

Maguire hian sawisel hlawh viau mah se League Cup nomawi a chawi a, hemi hma lama captain Michael Carrick, Antonio Valencia leh shley Young ten nomawi an chawi lo. Man United captain nghet zingah Roy Keane-a'n nomawi a chawipui tam ber. Keane hian Premier League nomawi pali, FA Cup pahnih bakah Champions League, Intercontinental Cup leh Community Shield pakhat a chawipui a ni.