Wolves-ah Doherty a kir

Wolverhampton Wanderers chuan an full back chhuak tawh Matt Doherty chu an club-a khel turin an lalet leh ta a, kum thum chhung atan contract an ziahpui.

Kum 31 mi Doherty hian Wolves aṭanga a professional zinkawng zawh ṭanin, season 10 zet a cham hnuah, kum 2020 khan Tottenham Hotspur a zawm. Mahse, London club-a manager inthlak kual reng karah a insiamrem thei lo a, hmun a chang phak meuh lo.

January khan Atletico Madrid a pan a, mahse, La Liga club-ah pawh hmun chang phak loin, match hnih chiah a khel a, Molineux-ah free agent ni chungin a kir leh ta.

Wolves sporting director Matt Hobbs chuan, "Doherty a lakluh theih tih kan hriat khan, kan manager chuan laklet a duh nghal êm êm mai a ni.

"Spurs leh Atletico Madrid lama a kal hnuah a theihna tak tak pholan châkin a tuihal a, full back position-ah inelna ṭha zawk siamin, min tiṭha leh sawt dawn a ni," a ti.

Doherty hian Wolves-a a cham chhungin match 302 a khel hman a, goal 28 khungin, assist vawi 41 a nei a, 2018-19 season-ah phei kha chuan an Premier League match zawng zawngah a inlan vek - league-a season zawna pasarihna an nih theih nan a thawhhlawk hle.

Wolves-in 2018-19 season-a Europa League quarterfinal an thlen khan Wolves squad-ah a awm bawk - Wolves hi an inthuam ṭha nasa hle.

Julen Lopetegui enkawlna hnuaiah Wolves an indinthar mek a, nipui transfer-ah player pasarih ngawt an lalut tawh - season hmasaa loan-a an hawh Matheus Cunha chu a nghetin an lalut a, Metz aṭanga Boubacar Traore an lakluh chu an club transfer langsar zual a ni bawk.