Benfica lakah Al-Nassr-in goal chhuah hnem

Saudi Pro League club Al-Nassr-in Cristiano Ronaldo an kawl avangin ngaihven an hlawh a, sum an ngah miau avangin season ṭan hma friendly match-ah pawh Europe club ṭha an hmachhawn thei a, hmasawn zawngin an kal zel.

Chutihrualin khelmualah erawh result ṭha hmuh tur a awm rih lo a, Celta Vigo laka 5-0 zeta an mualpho hnuah Al-Nassr-in Estádio Algarve-ah Benfica hmachhawnin 4-1 in an tlawm.

Benfica tan an player thar Angel di Maria a langsar a, Argentine forward hian minute 23-naah goal mawi khungin Goncalo Ramos-a'n first half-ah goal hnih a khung belh. Al-Nassr-in Sultan Al-Ghannam hmangin halftime hmain siphurh sut ṭhen mah se Benfica hian Andreas Schjelderup hmangin second half-ah an khung belh a, 4-1 in inkhel a tawp.

Al-Nassr tan captain Cristiano Ronaldo-a'n danglamna a la siam thei lo a, Saudi club hian PSG (July 25) leh Inter Milan (July 27) an hmachhawn leh ang.