Mane-a'n Saudi pan dawn?

Bayern Munich-a tlatlum lo Sadio Mane chuan Saudi Pro League club Al-Nassr nen inbiak a duh ta a, Liverpool forward hlui hi Allianz Arena-a a cham aiin Cristiano Ronaldo nen club khata an khelh a rinawm ta zawk.

Senegalese forward Mane hian German champion tana khelh la duh mah se club lamin chhuahtir dan an zawng. Nikum nipui bazarah khan Mane hian euro maktaduai 32-in Liverpool aṭangin Bayern hi a zawm a, season khatnaah hian league match 25 khelin goal sarih a khung.

Mane hian Allianz Arena-ah a che ṭha tawk lo a, Bayern-a awm nghet sa player ṭhenkhat nen an thawhona a ṭha tawk lo bawk. Senegalese forward hi a tirah Al-Nassr pan duh lo mah se tunah erawh Saudi lama kal pawi a ti tawh lo. Khawthlang media-te chuan Mane leh Al-Nassr te hian thuphungin mimal inremna an nei tawh niin an sawi.