Indian Super League - Nipui transfer boruak a ‘hot’

September aṭangin Indian Super League khelh ṭan a ni leh tawh dawn a, European football transfer a ngaihnawm tluk zetin Indian football ngaintute tan nipui transfer a ngaihnawm takzet.

I League champion RoundGlass Punjab-in ISL an khelh dawn avangin ISL-a inlan tur club pawh 12 an ni ta a, RoundGlass hian an hming pawh thlak tawhin, Punjab FC tih hming chawiin an inlan ang.

Player ṭhenkhat chu Indian football-a kan la hmuh ngai lohte an ni a, ṭhenkhat erawh Indian football-a mikhual tawh lo tak takte an ni hlawm - ram pawn player langsar tak takin tun season-ah pawh ISL an khel leh dawn.

ISL club-ten ram pawn player paruk chiah an chhawr theih avangin Indian footballer-te hlutna pawh a sang zual a, transfer chanchin ngaihnawm tak tak hriat tur a awm nual.

Hmasawnna

Tun hma chuan Indian football-ah player-ten kum khat bak contract an ziak meuh lo a, inhliam chuan club nei loa awm nghal mai chance a sân avangin hliam nei chung pawhin player tam takin an khel lui fo a, an duh angin an career a rei theih loh phah ṭhin.

Player-ten kum khat lek lek contract an ziah avangin an club zawm leh tur pawh free transfer-in an zawm tlangpui a, player inleina mumal a awm loh avangin club lamin transfer fee-a sen emaw lakluh emaw an nei ngai lo.

Mahse, mumal taka Indian Super League kalpui a nih hnuah transfer thlengin a ṭha zawngin a nghawng a, player-ten kum thum/kum ruk thlengin contract an ziak ve ta a, man neiin player an inchhuahtir ta fo bawk.

Mizoram Premier League club-te ngei pawh hei hi a chhawrtu an ni a, an player neihte Indian club langsar zawkin an duhin, a thlawna chhuahtir tawp loin an hralh a, hei hian kawng tam takah club a pui.

Sum a tam ta

Kum 2012 khan I League club Prayag United chuan Indian football-ah thil danglam thlen tumin squad chhah tak an din a, sum pawh an seng hnem - Costa Rica international Carlos Hernandez leh Indian football-a hming dai tawh lo tur Ranti Martins te ho an lalut.

Indian football-ah pawh Mizo legend S. Malsawmtluanga, khatihlaia India number 1 keeper Subrata Paul te ho an lalut a, mipui mit latu ber erawh Gouramangi Singh niin, Manipur defender hi kum khata vaibelchhe khat hlawh turin an lalut.

Hetihlai hian Mangi hi "The Rs 1 crore boy' tiin hminglem an pe hial a, Indian footballer zingah ani aia hlawh hnem an awm lo - tunah erawh thawnthu a danglam lo. ISL player zingah season khata vaibelchhe khat hlawh sawi tur an awm ta nual a, Indian football-ah sum a pung zel.

Hei hi a chhan langsar ber chu khawvel huap pawha mi hausa langsar ni phakten Indian football an luhchilh ve ṭan tak vang a ni a, Indian football-ah pawh transfer fee leh player contract rei zawng thlengin sawi rik a ni ta fo mai.

An to si!

April 2021 khan Indian player ṭhangduang Lalengmawia Ralte (Apuia) chuan NorthEast United chhuahsanin Mumbai City a zawm a, Mumbai club hian Mizo rawlthar lei chhuak tur hian vaibelchhe hnih ngawt an seng.

Hetihlai hian Apuia hi ISL chanchina player man to ber a ni nghal a, kum nga chhung atana contract ziaktu midfielder aia player man tam zawk an awm lo - mahse, a la rei lo asin. Kum 2023 a her chhuah leh meuh chuan Apuia record hi khum a ni der.

Mohun Bagan chuan tun nipui transfer-ah sum an seng na a, "A mit châk zawng apiang a hlah lo," tih ang maiin Indian football-a an player duhzawng chu bitum chat a, an hlawhtling leh nge nge zel.

Kolkata club hian Chennaiyin aṭangin midfielder Anirudh Thapa an lalut a, India international tan hian a manah vaibelchhe thum an seng nia sawi a ni - kum nga chhung contract an ziahpui a, kum tin vaibelchhe thum hi an hlawhtir dawn bawk.

Bagan an hausa

Tun nipui transfer-a che na bera chhal ngam chu Mohun Bagan an ni. Bagan hian Delhi FC aṭangin season hnih chhung FC Goa-a loan-a khel tawh Anwar Ali chu an la lut a, Anwar nena an inremnaah hian vaibelchhe 11 an seng niin an sawi.

India centre back hian kum li chhung atan Bagan hi a zawm a, kum tin vaibelchhe hnih a hlawh ang. Vaibelchhe thum dang erawh Delhi FC kutah a lut dawn nia sawi a ni a, a vaia an sen hi vaibelchhe 11 a tling tihna a ni.

Bagan hian Kerala Blasters aṭangin Sahal Abdul Samad chu an thlem chhuak bawk a, Indian midfielder la chhuak turin Blasters hnenah a sum faiin nuai 90 an pe a, Indian defender ṭha ber pawl Pritam Kotal an pe tel bawk!

Sahal hian kum nga chhung atan contract ziakin, a tir kum thum chu kum tin vaibelchhe 2.5 a hlawh dawn niin an sawi a, hei bakah hian a khelh ṭhat dan a zira pek belh tur a la awm cheu bawk - Bagan an che na takzet.

Khawia mi nge?

Heti taka Indian club-in sum an ngah hi tam tak tan chuan thil mak a ni mai thei. Mahse, Mohun Bagan Super Giants tih hming pu ta club-ah hian ISL din tirha ATK neitu RP-Sanjiv Goenka Group chuan 80% share an nei.

RPSG hian Indian Premier League club Lucknow Super Giants an nei bawk a, RPSG neitupa Sanjiv Goenka hian dollar tluklehdingawn 2.4 hausakna a neih avangin a duh ang player lei turin sum a nei - a la insen belh zelin a rinawm.

Tun nipui transfer-ah pawh Indian player langsar tak tak bakah hian ram pawn player pahnih an lalut leh der tawh a, Spanish second division club Cartagena aṭanga Armando Sadiku lalutin, ani hi Albania tan vawi 38 inlana goal 12 khung thei a ni.

Bagan hian A League club Central Coast Mariners aṭangin Jason Cummings an lalut tawh bawk a, season hmasa khan match 29-ah goal 21 khungin, Australia tan match thum a khel tawh - PFA A-League Team of the Season-ah pawh a lang a, kar khatah nuai 9.7 a hlawh dawn niin an sawi.

Mi thar

Indian Super League-a la inlan ngai lo, tun season atana ISL club zawm tawh an awm nual a, an la awm belh zel bawkin a rinawm. Dutch defensive midfielder Yoell van Nieff chuan Mumbai City a zawm a, season hmasa lawka Hungarian top flight league khel a nih avangin a chhe thei lo.

Bengaluru striker thar Curtis Main hian season hmasa khan Scottish Premiership club St Mirren tan a khel a, match 37-ah goal kua a khung. Football a khelh ṭhinna level ngaihtuahin ISL-ah a tlangnel ang.

Jamshedpur winger thar Alen Stevanovic hi Inter Milan leh Torino tana Serie A lo khel tawh a ni a, MLS thlenga sulhnu lo nei tawh a nihna hi a ṭangkai dawn - season hmasa khan Serbian top flight club IMT tan a khel a, Serbia tana vawi thum inlan tawh a ni.

Kum 31 mi Jonathan Moya chuan Hyderabad FC a zawm a, ani hi Costa Rica tan pawha vawi 10 inlan tawh a ni - South Korean second division club FC Anyang aṭangin Hyderabad a pan a, CONCACAF League nomawi thlenga lo chawi tawh a nih avangin tawnhriat a nei ṭha.

Hello Australia

Tun hnaia ISL-in bazar nana a hman langsar tak pakhat chu Australia a ni a, Saudi Pro League-in European football a run ang em chu phak lo mah se, an neih ṭhat ber ber an chhuhsak fo.

Tun season-ah pawh A League Team of the Season-a tel Jason Cummings chu Bagan-in an la a, kum 2019 khan A League top scorer Roy Krishna chu Bagan hian an lo la tawh bawk - tun season-ah pawh ISL-in A League an run.

Newcastle Jets forward Jaushua Sotirio chuan Kerala Blasters a zawm a, mahse, training-naah inhliam zuiin, kuminah chuan a inlan hman a rinawm lo! Kum 27 mi Joe Knowles chuan Brisbane Roar chhuahsanin Hyderabad a zawm bawk.

Sydney FC player Paulo Retre chuan FC Goa a zawm a, right back, defensive midfielder leh winger-ah te a chhawr theih - kum 27 mi Jordan Murray pawh Australian player a ni a, ani erawh Blasters leh Jamshedpur tana lo khel tawh niin, Thai club Nakhon Ratchasima aṭangin Chennaiyin a zawm.