Burnley-in City keeper an la lut

Premier League kai thar Burnley chuan treble champion Manchester City aṭangin goalkeeper James Trafford an lalut a, a man hi pound maktaduai 19 thlenga sang chho thei tur a ni.

Burnley hian £15mtd an pe phawt ang a, a khelh ṭhat dan a zirin £4mtd pek belh tur a ni ang - hei bakah hian Burnley hian an hralh a nih chuan 20% chu City kutah a lut dawn a, Manchester khaw club hian an duh chuan an lei let thei bawk ang.

Kum 20 mi Trafford hian Premier League match la khel lo mah se keeper hmabak nei êng tak a nih avangin rimtu a nei nual a, Burnley tan English keeper an chang thei hi lawmna tur a ni.

Trafford hian City-a hun a hman chhungin Pep Guardiola enkawl team tan khel miah lo mah se League One club Accrington Stanley leh Bolton Wanderers-ah loan-in a khel ve ve tawh a, season hmasa khan Bolton tan hian inelna hrang hrangah match 52 ngawt a khel.

UEFA European Under-21 Championship 2023 khelh zawh takah khan England chu champion nomawi chawipuiin, team of the tournament-ah a lang phak - match ruk chhung goal chhuah loin record a siam a, final-a Spain nen an inkhelh ṭumin Abel Ruiz-a penalty pet chu ṭha zetin a dang bawk.

Burnley hian £19mtd hi a vaia an pek a ṭul a nih chuan Trafford hi an club chanchina player man to ber a ni nghal ang - Chris Wood (2017) leh Ben Gibson (2018) te chu Burnley hian £15mtd-a lo lei tawhin, official-a an club player man to ber record ding lai a ni a, hei hi Trafford hian a khum thei dawn a ni.

City legend Vincent Kompany-a enkawl City hian goalkeeper Lawrence Vigouroux chu Leyton Orient aṭangin an lalut tawh a, season hmasaa an number 1 keeper, Kosovo international Arijanet Muric chu an la kawl bawk.

Burnley hi nipuiah an bazar nual tawh - West Brom aṭangin defender Dara O'Shea an lalut a, Borussia Monchengladbach aṭangin centre back Jordan Beyer an lei a, Swansea City aṭangin Michael Obafemi an lalut bawk - Obafemi hi season hmasa khan loan-in an hawh tawh.

FC Basel aṭanga Switzerland forward Zeki Amdouni an lakluh chu tun nipuia Burnely transfer langsar bera chhal ngam a ni a, a man hi tarlan ni lo mah se £16mtd vel niin khawthlang media-te chuan an tarlang.

Switzerland tan match nga a khelha goal nga khungtu Zeki Amdouni hian season hmasa khan Basel tan inelna hrang hrangah match 52 khelin, goal 22 a khung a, assist vawi nga a nei bawk.