Luton Town-a khel tur Nakamba

Premier League-a a vawi khat nana inlan tur Luton Town pawhin English top flight league-a an season hmasa berah tih mai mai an tum lo a, nipui transfer-ah player an inlakluh belh zel - Aston Villa aṭangin midfielder Marvelous Nakamba an lalut leh ta.

Zimbabwe international hian season hmasa chawhnu lam kha Luton-ah hian loan-in a lo khel tawh a, Championship playoff final-a Coventry nen penalty shootout hmanga Premier League khel tur an chinfelnaah penalty hi a khung.

Marvelous Nakamba hian an ram club Bantu Rovers aṭanga a career ṭanin French club Nancy, Eredivisie club Vitesse, Belgian club ṭha Club Brugge leh Aston Villa tan a khel tawh a, tunah Luton Town tan a khel leh dawn ta.

Nakamba chuan, "Luton-a ka zinkawng zawhte chhunzawm tura ka lo kir thei tur hi ka lawm khawp mai," a ti a, Luton manager Rob Edwards chuan, "A thawhrimna piahlamah, a inngaihtlawmna hian min hneh takzet. He club a zawm ni aṭang khan kum 10 vel awm tawh ang mai niah ka ngai a ni," a ti.

Aston Villa tan season thum chhunga match 68 kheltu Nakamba hian kum thum cham turin Luton-ah hian contract a ziak a, a man zat erawh tarlan a ni lo.

Luton hian Nakamba hma hian player pathum an lo lalut tawh bawk a, Championship club Rotherham United aṭangin winger Chiedozie Ogbene, League One club Barnsley aṭangin centre back Mads Juel Andersen leh Championship club Birmingham City aṭangin midfielder Tahith Chong te an lalut a, an man zat erawh tarlan a ni lo thung.