PSG leh Mbappe inkar a buai; Zin tur zingah an telh ve duh lo!

Paris Saint Germain chuan an forward ṭha Kylian Mbappe lakah thutlukna dengkhawng tak an siam, chu an thutlukna chu France international hi season thar inbuatsaih tura Japan leh South Korea lama an zinaah an hruai ve duh lo a ni.

PSG leh Mbappe chanchin hian football khawvel a deng chhuak nghal a, nipui bazar lai a nih bawk avangin khawi lamah nge a kal ang tih chu an inrinsiak nasa hle - a chhuak ngei dawn em, tih erawh hriat a la ni lo.

France internaitonal Mbappe hian, "Contract ka neih lai chu ka zah tur a ni," tiin kum khat cham chhunzawm a la tum a, a club lam lahin contract a pawtsei lo a nih chuan season khat kawl leh ai chuan a duh lo chung pawh nawr chhuah an tum mek.

A chhuak duh lo a nih chuan Paris club tan nawr chhuah luih theih a ni ngawt bik lo, chutihrualin Mbappe tan amah chhawr duh lo leh nawr chhuah tum rengtu bula season khat hman hi a rei hle ang, bazar tingaihnawmtu an ni dawn.

Buaina chu

Nikum nipui bazar lai khan Real Madrid chuan Mbappe lak tumin thapui an thawh a, an inhnaih hman tawh hle. Mahse, hun tepter tawh takah a rilru thlakin PSG tan contract thar a ziak ta zawk.

A contract hian sum tam tak bakah thuneihna a keng tel a, an inremna hi tun season tawp ruala zo tur a ni leh mai tawh; an inremna zingah hian kum khat atana pawh sei theih tih a tel bawk a ni.

PSG thuneitu lam chuan kum khata pawh sei theih chungchangah hian a thuphung chuan an inrem tawh niah an ngai a, ngaihṭha takin an awm - mahse Mbappe chuan a contract hi a pawhsei loh tur thu a tichiang.

PSG lam thu

Mbappe a ṭawng chhuah hnu hian Paris Saint Germain an ṭawng chhuak zui ve nghal mai lo, coach thar atana Luis Enrique an lakfel hnuah erawh inkaihhruaina khauh leh mumal an nei dawn tih a chiang.

PSG president Nasser Al-Khelaifi chuan club aia lian tumah an awm loh thu leh, an forward Mbappe ngei pawh a hma hun tichiang rang turin tun thlatir lam khan a lo hrilh tawh - thutlukna siamna atan chawlhkar hnih hun a neih thu a sawi tel hial.

Al-Khelaifi chuan, "Tun dinhmuna khawvela player ṭha ber hi a thlawnin kan chhuahtir ngawt thei lo," tiin a sawi a nih kha, sum tam taka an lei hi a thlawna chhuahtir ngawt an tum bik lo.

An hmaih ta!

Kar hmasa khan Mbappe hian Paris Saint Germain tan training a zawm pangngai - Zirtawpni khan an training ground-ah Le Havre nen an inkhelh ṭum pawhin minute 30 chhung a inlan a, goal pawh a khung.

Mahse, coach thar Enrique hoa Japan leh South Korea lama zin tur hi Inrinni khan tihchhuah a ni a, an zingah hian Mbappe hi a tel ta lo, a nau kum 16 mi Ethan Mbappe erawh chu a tel thung a ni.

Mabppe a tel loh lai hian Neymar hming a lang thung. Brazilian forward hi season hmasa tawp lamah khan hliam vangin a buai a, kuminah chuan season tir aṭangin a inlan thei ngei dawn niin a lang.

Chhantu a nei

PSG leh Mbappe chanchin an hriat hnuah France rama footballer intelkhawm pawl French Footballers' Union chuan thuchhuah an siam a, player chu a contract neih lai zahsak turin Paris club an ngen.

Thuchhuah an siama an tarlan dan chuan, "Player dangte ang bawkin ani pawh hian contract a neih lai chu nuam ti takin a hmang mai tur a ni a, enhranna a awm tur a ni lo.

"Manager leh club thuneitu lam pawhin player-te an duh dan bakin an nawr hi kan hrethiam lo a, hei hi rilru lam thlenga nghawng thei a ni, hetianga an kal zel a nih chuan dan hmanga hmalak pawh a theih," an ti.

Chhuak ta se

AS Monaco aṭanga PSG a zawm khan Mbappe hi pound maktaduai 165.7 man a tling daih tawh, hei hi kum 2017 daih tawh kha a ni a, khawvel player man tam pahnihna a ni - a chungah Neymar chiah a awm.

Mbappe hi chhuak dawn ta se, a kal châkna ber chu Real Madrid a ni. Spanish club lian hian lak pawh an duh ngei mai, mahse nakkum maia a thlawna lak theih tur hi tuna sum tam tak senga lei kher hi an duh ang em, tih chu zawhna a ni.

Tun dinhmunah France international hian kar khatah £1,222,000 a hlawh tling nia sawi a ni a, a hlawh pek tur a san bakah a man atana sum sen ṭeuh kha buaina a tling thei, chutihrualin Real Madrid tan remchang bawhpelh phal chi erawh a ni bik lo thei bawk.

PSG leh player ṭha

Tun hma deuh khan Thierry Henry chuan, "PSG hian Lionel Messi an au nawmnah a, tun hmain Neymar leh Mbappe te an au nawmnah tawh bawk," tiin an club chezia chu mak a tih thu a lo sawi tawh.

Arab sum hmangin thawklehkhata siam len thut an ni a, sum nei tam mah se fans lam hian club lian zia an pu phak lo niin a lang a, club thuneitu lam pawhin thutlukna fuh tawk lo an siam ta zauh zauh niin a lang.

Messi a chhuak fel a, inkhelh baka nawmchen tuipuitu Neymar erawh a la cham. Sum leh thuneihna thlenga an pek nia sawi Mbappe chu kum khat lek hnuah an ngaithei lo leh si, player dang an enkawl danah pawh an inennawn chu a ngai.

Mi bik Mbappe

Kum 20 a tlin hma khan Mbappe hi khelmual chhungah chuan a puitling daih tawh a, striker/forward ṭhain a neih tur ang chu a nei kim hman vek tawha ngaih a ni - club leh ram tan rinrawl a ni phak tawh.

World Cup 2018 khan France a champion pui a, a club hmasa Monaco tan ṭha taka a khelh hnuin PSG tan pawh inelna hrang hrangah match 260 aṭangin goal 212 a khung der - season ruk chhungin club tana goal khung hnem ber a ni hman.

A kum a la tlemin hmabak a ngah a, amah la theitu tan chuan chanchin lawmawm a ni ngei ang. Chutihrualin kum naupangte ni chungin sum leh hlawhtlinna a nei a, khelmual pawn lama chanchin a nei hnem deuh erawh khalh ngil a ngai niin a lang.