MPL-ah Mapuia a rawn kir

Mizoram Premier League striker hming langsar zinga chhiar tel Lalkhawpuimawia (Mapuia) chuan I League leh ISL club tana a khelh hnuin tun season-ah MPL club Chanmari FC tana a khelh tur thu a tichiang.

MPL vawi hnih champion tawh Chanmari FC chuan Mapuia an lakluh tur thu hi social media-ah AC/DC hla lar Thunderstruck intro music rawn hmangin an pho chhuak. Mizo striker ṭha an chan theih avangin an phur phah tih a chiang hle.

Kelkang tlangval Mapuia chuan, "MPL ka khel leh tur hi ka phur a, Chanmari FC tan ka theihna zawng zawng ka chhuah ang," tiin Vanglaini a hrilh a, I League emaw ISL club emawa kal leh a tum thu a sawi tel bawk.

Mapuia hian MPL-ah coach Chawnthansanga hnuaiah Chanmari West-ah bul a rawn ṭan a, Dinthar FC-ah hming rawn chher lehzualin hemi hnu hian Chhinga Veng leh Aizawl FC tan a khel leh bawk.

I League club AFC aṭangin Mapuia hian Churchill Brothers leh NorthEast United tan a khel tawh a, season liam ta khan Churchill tan I League-ah goal hnih a khung a ni.