Sawmtea hoa khel tur Kalighat

Calcutta Football League first divison club Kalighat Sports Lovers Association chuan Mizo tlangval B. Malsawmzuala chu coach atan an la a, season tharah Premier Division kai ngei an tum.

First Division hi July 25, Thawhlehni aṭangin ṭan a ni dawn a, Kalighat hi season ṭan hma hian MLA Cup-ah an champion. Coach Sawmtea hian Mizo player pasarih a chhawm bawk a, an champion-na kawngah pawh Mizo player-ten an thawh hlawk hle.

Tu nge Sawmtea?

B. Malsawmzuala hi Mizo player talent nei ṭha zinga mi a ni. August 2006 khan Nike Cup-ah India aiawh Mohun Bagan U15-in Manchester United U15 chu Carrington Ground-ah an hmachhawn a, David Lalrinmuana'n goal hmahruai a khung. David-a goal khung tur siamsaktu hi Sawmtea a ni.

Second half-ah mualneitu Man United 4-1 in chak mah se India rawltharte hian fak an hlawh hle. Sawmtea hian MPL-ah pawh sulhnu ṭha tak a nei a; Aizawl FC, Luangmual FC, Mizoram Police, Zo United leh Ramhlun North tan a khel tawh. MPL2-ah an veng club Luangmual tan captain-in final a hruai thleng.

Kum 2017 aṭangin Sawmtea hian coaching hna a thawk ṭan a, Aizawl FC academy a enkawl. I League-ah pawh Santosh Kashyap leh Standly Rozario te hnuaiah Aizawl FC assistant coach hna a chelh tawh bawk. Sawmtea chuan, "Mizoram pawna chona thar hmachhawn hi ṭha ka ti a, hei vang hian Kalighat Sports Lovers Association hi ka pan a ni," tiin Vanglaini a hrilh.

Kalighat leh a chhehvel

Kolkata-ah hian Kalighat MS leh Kalighat Sports Lovers Association a awm a, ngaih pawlh loh tur a ni. Kalighat MS hian inelna sang zawk Premier Division an khel a, Kalinghat SLA erawh Premier Division kai an hmachhawp a ni thung.

Kalinghat SLA neitu Babun Banerjee hi Bengal chief minister Mamata Banerjee nen unau an ni. Kolkata club-in Sawmtea an lakluh hian Mizo coach hian Mizo tlangvalte Kalinghat SLA a khel turin a hruai thla ve thung.

Sawmtea ruala Kalinghat-a kalte chu Lalnunsiama Hlondo (Armed Veng South), Lalchhanhima (Tetepuia, Lunglei), Lalthankima (ThaThana, Ainawn Veng), Lalngaihsaka (Lungdai), Laldanmawia (Republic Veng), Lalruatpuia (South Sabual) leh Lalthanpuia (Tepuia, Mamit) te an ni.

CFL First Division-ah hian club 24 an awm a, club paliin Premier Division an kai dawn. Sawmtea leh a hote hian eng nge an thlen dawn tih chu hunin a hril ang.