Jackson laka beisei nei sang Poch

Chelsea manager Mauricio Pochettino chuan a striker thar Nicolas Jackson lakah beisei a nei sang tih a sawi a, chutihrualin insiamrem tur erawh chuan hun a mamawh deuh a rin thu a sawi bawk.

Argentina manager Poch kaihhruaina hnuaiah Chelsea hian indinthar an tum mek, season thar inbuatsaihna inkhelah Brighton chu 4-3 in an hneh, he inkhelah hian Jackson chuan goal khat a khung bakah a ṭhiante khung tur vawi hnih a siamsak a ni.

Pochettino chuan, "Tun ang inkhel hi Nicolas Jackson hian a mamawh, a bik takin Premier League khel tur chuan intuaihriam hmasak hi a ngai a ni. Theihna a nei sang a, ani ang Chelsea-in kan la lut a nih chuan thil ṭha kan hmu tihna pawh a ni.

"Team tan mawhphurhna sang tak a chelh dawn a, hmasawnna tur a la neih lai pawh kan siamṭha zel ang. Player ṭha tak ni tawh mah se Premier League khel tur erawhin insiamremna hun a mamawh ka ring," a ti.

Senegal international hian June thla khan Villarreal aṭangin Chelsea hi a zawm, season hmasa khan La Liga club tan hian match 38 a khelh aṭangin goal 13 a khung a, a goal khung zinga pakua chu match hnuhnung pariata a khung a ni hial.

Blues hian RB Leipzig aṭangin Christopher Nkunku chu pound maktaduai 52 zet sengin an la lut bawk a, tlarhma lamah hmel thar kan hmu dawn tihna a ni a, chutihrualin Poch-a sawi ang hian an theihna tak pholang tur chuan hun an mamawh ang.

Player thar khelh dan avangin Chelsea an lawm a, an lawmna belhchhahtu chu Mykhailo Mudryk-a'n goal a khung bakah a hmuhnawm tel bawk. Arsenal hel lai an chhuhsak hian season hmasa khan beisei a phak lo hle, friendly match-a mual sira chak taka a tlan anga a tlan chhunzawm thei a nih chuan beisei a pha tawh khawp ang.

Pochettino chuan, "Tlarhma lama khel ṭhinte chuan goal khung hi an mamawh, inrintawkna an neih phah ṭhin a ni. Tunah hian Premier League lama kan match hmasa ber khel turin kan inbuatsaih mek a ni a, a ṭha thei ang bera hun hman kan tum ang," a ti.