Friendly Match: United-in Arsenal ṭum hnih an hneh

Pathianni zing khan MetLife Stadium, New Jersey-ah entu 82,262 an pung khawm a, Manchester United-in Arsenal 2-0 in an hneh. Friendly match-ah inremna sa angin minute 90 match khelh zawh hian penalty shootout hmangin an inel leh a, Erik ten Hag-a hote an chak leh bawk.

Captain thar

Manchester United-in Arsenal an hmachhawn hma hian Bruno Fernandes chu captain nghet a nih thu an puang a, Portuguese midfielder hian goal hmangin lawmthu a sawi.

Minute 30-naah Fernandes hian box pawn aṭangin a pet goal a, goalkeeper Aaron Ramsdale-a'n a tihtur a ti tawk lo. United hi vannei ni se hei aia hma goal khung thei tur an ni a, Fernandes-a ball pek ṭha chu Antony-a'n goal-ah a chantir thei lo.

Chutihrualin Gabriel Martinelli a ke a hmui tawk lo a, United-in goal an khung hmain Brazilian forward hian chance ṭha ṭum hnih a hlah. United keeper Tom Heaton-a'n a dang ṭha ve bawk.

Minute 37-naah Arsenal defender Gabriel Magalhaes-a'n ball a pet ṭhelh a, Jadon Sancho-a'n chak taka la tlangin goal ṭha bik a khung. First half-ah Man United-in 2-0 in hma an hruai.

Second half-ah goal luh belh lo mah se chance erawh a tam. Arsenal-in siphurh sut tumin an nawr a, Eddie Nketiah finishing a tawih tawk lo. Gunners player thar Kai Havertz-a'n hnai tak aṭangin a tauh over.

Man United pawh goal khung belh thei an ni a, Scott McTominay-a tih ṭhat chu Facundo Pellistri-a'n lalutin keeper chauh a hmachhawn hnuah goal zawnah a pet lo.

Fuh leh fuh lo

Man United-in pre season match thum an khelh tawhah hnehna an la chang vek a, goal an la chhuah lo. Ten Hag-a hoten Arsenal hi team ṭha an hmachhawn hmasa ber a ni a, kim lo chunga hnehna an chan theih avangin an result-ah an lawm ang. Chutihrualin Amad Diallo erawh hliam vangin lakchhuah a ngai a, an lawm a kim lo.

United tan rawlthar Kobbie Mainoo-a'n bul a ṭan a, Declan Rice hmaah kum 18 mi Mainoo hi a rintlak hle. Goal hmahruai Bruno-a'n a khung theihna turah pawh Mainoo hi a thawh hlawk. Team angin Man United an khel ṭha a, manager Ten Hag pawh a lawm. Goalkeeper Andre Onana erawh a la inlan lo a, bul ṭantu Tom Heaton-a ball vawrh chu Arsenal tlarhnung tan buaina tham a tling.

Gunners erawhin player thar Kai Havertz, Jurrien Timber leh Declan Rice te bul an ṭantir vek a, sum ṭhahnem tak an hmanna player-ten beisei an la pha tawk lo. Chutihrualin tun hi inzir hun a ni a, Mikael Arteta-a'n season ṭan hmaa ṭha zawka team rem khawmna hun ṭha a la nei.

Arsenal forward Bukayo Saka chuan, "Friendly a ni emaw ni lo pawh emaw pawh ni se, Manchester United laka chak loh hi chu pawm thiam a har a ni. Season liam ta pha turin kan fitness level siam ṭhat kan la mamawh a, thawhhona ṭha zawk kan la mamawh bawk. Kan game plan kan hriat chian tlan a ngai a, inelna ṭan hunah chuan kan inpeih tawh tur a ni," tiin a sawi.