Alex Telles-a'n Al Nassr a zawm

Brazilian wing back Alex Telles chuan Manchester United aṭangin Al Nassr a zawm. Telles-a man chiah hi tarlan ni lo mah se euro maktaduai 10 vel tura ngaih a ni a, a chet ṭhat dan a zirin Saudi Pro League club hian pawisa an pek belh ang.

Kum 30 mi Telles hian kum 2025 thleng daih contract a ziak. Brazil international Telles hian October 2020 khan FC Porto aṭangin Man United hi a zawm a, English club tan hian match 50 khelin goal khat a khung.

Season liam ta khan Telles hi Sevilla-ah loan hmangin a chhuak a, match 27 khelin UEFA Europa League-ah a champion pui. Man United-in Luke Shaw an neih avangin Telles-a tan hmun a awm lo a, Cristiano Ronaldo hnung zuiin Al Nassr a pan ta a ni.