Goal nena bul ṭan Messi

Lionel Messi chuan Inter Miami tan a match hmasa ber a khel a, thil thlen dan chu thawnthu ziaktuin thiam taka a duh ang taka thawnthu a phuah ang mai a ni - freekick goal mawi nen United States-ah boruak a siam.

Major League Soccer club Inter Miami hian season ṭha lo tak an hmang a, tun hnaiah an chak hleithei lo. Inrinni zinga Mexican club Cruz Azul nen Leagues Cup an khelhah pawh chesual thei dinhmunah an ding.

Team pahnihte 1-1 in an inhnehtawk reng a, hun tawp hma chiahin Inter Miami hian freekick an hmu. A pet turin Messi a rawn ding chhuak a, Argentina captain hian hun tawp rualin an chakna goal a chhuih lut.

Kum 36 mi Messi chuan, "Mipui lamin hetianga hnehna chan hi an phu, an phu tawk ang ngeia hlimna kan siamsak theih avangin ka lawm. Fans puihnain hnehna chan chu thil tih ṭhin dan pangngaia chantir kan tum ang," tiin a sawi.

Mipui 20,000 lenna DRV PNK Stadium-ah fans an khat vek a, a hmuna inkhel entu zingah hian basketball legend LeBron James, tennis legend Serena Williams leh US TV star Kim Kardashian te pawh an awm.

Inter Miami neitu zingah hian David Beckham pawh a tel. England captain hlui hian hun tawp dawna Messi-a'n an chakna goal a khung lai khan a bianga mittui a dang zo lo, lawm avangin a ṭap hial a ni.

Kum 48 mi Beckham chuan, "A nihna tak sawi chuan, freekick kan hmuh kha chuan ka hlauthawng a, beiseina ka neih bakah kan tawpna tur ni maiah ka ngai, duhthusama ṭhain a hmawr chu kan bawk.

"Player ṭha bik Leo leh Sergio Busquets te ang kan nei a nih chuan, hetiang thil mak leh hlimawm hi chu kan tawng thei tur a ni reng a ni. Messi inkhel en tura lo kal zawng zawngte ka lawmpui, US leh MSL tan hun pawimawh a ni," a ti.

Inter Miami hi an che ṭha lo hle a, team 15 inelna Eastern Conference-ah a hniam ber an ni mek. Tun ṭuma an khelh erawh Mexican club-te nena inelna an buatsaih Leagues Cup a ni a, an result ṭha hi MSL lamah chhawm ngei an tum ang; MSL-ah chuan a zawnin match 11 chhung chak ni hmel hmu loin an kal mek.

Messi chauh an nei thar a ni satliah lo - Messi ang bawka Barcelona captain ni tawh Busquets an neih fel tawh bakah, defender Jordi Alba an nei tawh bawk. Spanish defender hi Atlanta United nen Nilaini zinga an inkhelh hunah chuan a inlan theih tawh a rinawm.