Nottingham Forest-a khel tur Ola Aina

Nigeria international defender Ola Aina chuan Nottingham Forest a zawm a, Premier League club-ah hian season khat chhung khel turin contract a ziak.

Kum 26 mi defender hian Serie A club Torino-ah a contract a hmang zo a, Forest hi free transfer-in a zawm - Chelsea, Hull City leh Fulham-ah te a lo khel tawh a, English football-ah a mikhual lo hle.

Chelsea aṭanga inzir chhuak niin, London club tan hian match ruk a khel ve hman a, Premier League match thum a khelhsak. Fulham tan 2020-21 season kha Premier League match 31 a khel bawk - a tlangnel nghal ang.

Forest coach Steve Cooper chuan, "Position hrang hranga khel thei, Premier League leh Serie A lama tawnhriat ṭha tak lo nei tawh a ni. Player ṭha tak a nih piahlamah, infiammi dik tak a ni a, kan team min tichak lehzual dawn a ni," a ti.

Aina chuan, "Premier League-a ka lo kir leh thei hi ka lawm hle. Khawvela league ṭha ber a ni a, chona thar hmachhawn zel hi kei chuan ka duh ṭhin a ni," a ti a, a phur thu a sawi.

London-a piang Aina hian age level-ah chuan England tana khelin, England Under-16, U17, U18, U19 leh U20 tan a khel vek a, mahse, senior player a nih hnuah Nigeria tana inlan thlangin, Super Eagles tan hian match 30 a khel tawh.