Sum tam tak aia Fulham thlangtu Silva

Premier League club Fulham boss Marco Silva chuan Saudi Arabia aṭanga sawmna a dawn ngei thu a sawi chhuak a, mahse, London club-a chhunzawm zel a tum thu a sawi bawk.

Kum 46 mi coach chuan, "Fulham tana ka inpekna hi a chiang êm êm a, ka chhunzawm zel bawk ang," a ti a, Saudi sawmna chiang taka a chhan dan erawh a sawi lang duh lo.

Kum 46 mi Silva hi Al Ahli nen sawizawm a ni a, Saudi club hian kum hnih chhunga £40mtd hlawhtir an inhuam nia sawi a ni.

Mahse, Silva chuan, "Season hmasaah pawh khan he club tana ka inpekzia hi ka lo pholang fo tawh. Chuvang chuan he thil chungchang hi sawi nawn fo ṭul ka ti lo a, hemi chungchang sawi tur hian ka lokal lo bawk," tiin press ho zawhna a chhang.

Portuguese coach Silva hian Fulham hi July 2021 aṭang khan enkawl ṭanin, Championship nomawi a chawipui a, Premier League a kaipui nghal - English top flight league an kai thar season-ah 10-na an ni nghal a, a hnathawh ṭhat avangin rimtu a nei nghal nual a ni.