Barcelona-in Juventus nena inkhelh tur an ṭhulh

USA-a pre-season tour neia zin mek Barcelona chuan Juventus nena friendly match an khelh tur chu player zingah damlo an awm nual avangin an ṭhulh a, ruahman ang chuan kal se nimin zingah khan European club langsar pahnih hi inkhel tur an ni.

Mahse, Barcelona chuan thuchhuah siamin, an player tam zawk chuan pum lam harsatna an tawk a, hei vang hian inkhel thei dinhmunah an ding lo - Santa Clara, California-a inkhel tura ruahmanna siam chu ṭhulh a ngaih phah.

Juve hian Barca an hmachhawn theih tak lohah chuan training session chu Levi's Stadium-ah an huaihawt ta ngawt a ni. Barcelona hi Nilaini zan dar 8:00-ah Arsenal nen pre-season match khel leh tura ruahmanna siam sa a ni a, player-te pawh an zia chho hman tura ngaih a ni.

Barcelona president Joan Laporta chuan, "Kan player-te an dam ṭhat leh vat kan beisei. Player-te chauh ni loin, team leh he club ṭantute tan pawh ruahman sa anga kan kal thei lo hi a pawi hle a ni," tiin a sawi.