Indian GP en tum an tam

Kumin September thla hian India chuan khawvela bike intlansiakna sang ber a thleng dawn a, a hmuna en tum an tam hle. Buddh International Circuit-a intlansiak en tur hian mipui 1,50,000 vel chu pungkhawm tura hisap a ni.

Gautam Budh Nagar Commissioner of police Laxmi Singh chuan, ram pawn aṭanga mikhual lo kal tur ringawt pawh mi 10,000 velin an hisap tih a sawi a, venhimna thawk tur police 300 te chuan training an nei ṭan tawh.

CP Singh chuan, "Greater Noida hian mikhual 1,50,000 vel thleng tura ngaih a ni a, chumi dawngsawng tur chuan kan inbuatsaih. India ram huap thil a ni satliah lo a, khawvel huap a nih avangin venhimna pawh a ṭha tawk tur a ni," tiin a sawi.

Tun season chhungin MotoGP hi intlansiak vawi 20 awm tura ruahman a ni. June 25 thleng khan inelna vawi riat an nei tawh a, tunah hian nipui chawlh an hmang mek - August 6 hian British Grand Prix an tlan leh ang.

Indian GP an tlan hma hian intlansiak pali an la tlan phawt dawn tihna a ni, rider che ṭha tak tak awm mah se mimal taka fal nalh an la awm lem lo - India ram an rawn thlen hunah champion a la chiang hman dawn lo, inelna a hmuhnawm dawn tihna a ni.

Mizote tan pawh khawvel rider ṭha tak tak hmuh theihna remchang a inhawng dawn tihna a ni a, hliam leh harsatna dangin a tlakbuak a nih loh chuan vawi ruk champion tawh Marc Marquez pawh a inlan ngei a rinawm.

A hmuna intlansiak en duh tan MotoGP website lamah ticket ngaihven theih a ni.