Kan inkawp rem lo a ni - Neymar

Paris Saint Germain forward Neymar chuan Lionel Messi leh Kylian Mbappe te nen player ṭha awmkhawm ni mah se, an duh leh beisei ang takin an inkawp rem lo tih a sawi chhuak.

Brazil international hi hliam vangin season chawhnu lamah a inlan mumal ve ta lo a, World Cup zawh hnuah Messi chuan beisei a phak lo bawk - Mbappe hoa theihtawp an chhuah chungin Ligue 1 nomawi an chawi hram.

Ligue 1 champion nih ringawt hi PSG neitu lam duhthusam a ni lo - Champions League lamah an hlawhtling thei tlat lo; Messi phei chu a chhuak tawh a, tun nipui bazarah Neymar leh Mbappe te pawh chhuak thut thei an la ni bawk.

Neymar chuan, "Team ṭha tak kan ni a, keimah bakah Messi leh Mbappe te hi khawvela a ṭha ber berte chu kan ni, amaherawhchu kan khelh hoin duhthusamin kan inman tawk lo, kan ṭhat dan ber a lang chhuak thei lo kha a pawi.

"Chutihrualin engkima hlawhtlin duh mah ila a rem vek bik lo, a chang chuan football hian thil ṭha zawng zawng min pe vek thei bik ṭhin lo a ni," tiin a sawi a, contract nei lai a nih avangin PSG chhuahsan tumna a neih lem loh thu a sawi bawk.