Villa-in Diaby an la lut

European football khel tur Aston Villa an inthuam ṭha mek zel a, France winger Moussa Diaby chu Bayer Leverkusen aṭangin an la lut. Villa chuan an player thar man zat leh contract rei zawng an tarlang lem lo a, mahse, khawthlang media-te chuan euro maktaduai 60 zet an seng niin an sawi.

Villa hian June 2021 khan Norwich City aṭangin Emiliano Buendia chu an la lut a, pound maktaduai 33 an seng - an club player man to ber a ni a, Diaby man zat tarlan hi a dik a nih chuan Villa record thar a ni, tihna a ni.

Diaby chuan, "Leverkusen-a ka hun hman kha hlim leh lawm takin ka thlirlet fo dawn a, mahse, tunah chuan bung thar kai a, chona thar hmachhawn ka duh tawh a ni," a ti.

Kum 24 mi Diaby hian kum 2019 khan Paris St-Germain aṭangin Leverkusen hi a zawm a, German Bundesliga club tan match 173 khelhsakin, goal 49 a khung a, assist vawi 48 a nei bawk - Villa an ṭhat phah sawt ang tih a chiang.

Unai Emery enkawl Villa hi nipui transfer-ah an che na viau a, season tharah Premier League club hmuhnawm ber pawl an nih a rinawm. Belgium midfielder Youri Tielemans chu Premier League aṭanga tla hlim Leicester City aṭangin an la lut a, Spain centre back Pau Torres chu Villarreal aṭangin an la bawk.

Diaby pawh hi France tana vawi 10 inlan tawh niin, kum 2021 khan ram tana a match hmasa ber a khel a, European football-ah pawh ram langsar ni phak ṭhiau pathum tana khel phak player vek an la la lut a, Villa fan-te 'puja' fuh lai tak a nih a rinawm.

Unai Emery hian nikum October khan Villarreal chhuahsanin, Villa hi a pan a, Premier League-ah pasarihna nihpuiin, season tharah Europa Conference League an khel dawn a ni.

Emery chuan, "Diaby hi kan enthla reng tawh a, goal tam zawk kan khung theih nan min puih a tum dawn a ni. Europe-a tawnhriat nei tawh player a ni a, a kum a la naupang a, position hrang hrangah a khel thei bawk," a ti.

Diaby hi PSG Academy aṭanga inzir chhuak niin, Emery-a'n 2016-18 inkara PSG a enkawl lai khan youth team tan a khel a ni - Emery chhuah hnu lawkah senior team tana a match hmasa ber chu September 2018 khan a khel a, kum 2019 khan Leverkusen chu kum nga chhung atan a zawm zui.

Leverkusen sporting director Simon Rolfes chuan, "Moussa Diaby hi Bayer 04-a a awm chhungin player ṭha takah a inchher hman a, ni tin club tana a inpekna leh thawhrimna te chu fak tlak a ni," a ti.

Rolfes chuan, "A khelh dan danglam tak leh a tlan chakna hmangin Moussa hian kan club-ah sulhnu ropui tak a hnutchhiah a, club tana a theihna zawng zawng hlan mi a ni," a ti a, Villa tan hriat a nuam ang.