Saudi lam pan duh Mitrovic

Fulham chuan an striker chhuanvawr Aleksandar Mitrovic chelh duh mah se, kum 28 mi striker hian Saudi pan a duh nia sawi a nih avangin a hma hun sawi thiam a harsa ta hle - club training pawh a zawm mumal rih lo.

Saudi Pro League club Al-Hilal chuan Mitrovic hi pound maktaduai 25-a lakluh tumin an lo dawr tawh a, mahse, Fulham chuan he dawrna hi hnar nghalin an striker hi zawrh lai a nih loh thu an sawi.

Mahse, Mitrovic ber hian chhuah a pawi ti lo nia sawi a ni a, khawthlang media-te chuan Serbian striker hian Fulham chu chhuah a duh thu a hrilh niin an sawi hial.

Serbia international hi Al-Hilal chuan kum khata £21.3mtd hlawhtir an inhuam nia sawi a ni a, hei hi kar khata £400,000 vel ang a ni - Fulham-ah hian kar khatah £120,000 vel a hlawh a, a hlawh punna tur hi a tam dawn hle.

Fulham hian nizan zanlaiah khan Brentford nen pre-season match an khel a, he inkhelah pawh hian Mitrovic hi a inlan dawn lo niin Fulham boss Marco Silva chuan a sawi lawk.

Silva chuan, "Thil hi a nih tur angin a la ni rih lo - sawmna a dawn vang pawh a ni chuang lo a, amah lam hi a ni ber mai. A ṭhiante bulah training a la nei tam tawk lo a, thil hi a nih tur angin a la ni lo, ka tih hian a sawifiah ber awm e," a ti a, Mitrovic-a chhuah chance hi a sang hle niin a lang.

Portuguese coach chuan sawi zawmin, "Mitro nen kan inbe tawh a, ka ngaihdan chu a hre tawh. Ka player-te tana a ṭha ber ngaihtuah tura he hmuna awm hi ka ni a, ven an ngaihnaah pawh ka veng ang. A chang chuan anmahni hian thutlukna an siam a ngai ve bawk a ni," a ti.

Fulham hi tun nipui transfer-ah sum ngah leh club lian zawkten run tumin an veh mek a, Mitro bakah hian Portuguese midfielder Joao Palhinha chu chhuak thei dinhmunah a ding mek bawk.

Hetiang boruak karah hian Fulham hian nipui transfer an hmang ṭha lo hle - player lakluh an la nei lo a, Silva chuan tuna an dinhmun chu Premier League hmachhawn nan a tawk loh thu a sawi.

Silva chuan, "Mitro aia ka ngaihtuahna luah nasa zawk hi tam tak a awm. Player pakhat chauh sawi thei kan ni lo - tunah hian season hmasaa kan hnena awm player pasarih ngawt kan chân tawh.

"Player langsarte kan zingah an la awm zawk a, mahse, player tam tak chân chung leh, pakhat tal pawh lalut loa Premier League hmachhawn tura inbuatsaih chu thil hautak tak a ni. Fan-te hlimna tal kan thlen a ngai a, keichuan chu chu ka ngaihtuah ber.

"Kan squad hi siamrem vat a, season hmasa aia inpeih hma ka duh. Tun hnai kar hnih chhunga ka player-te thawhrimna pawh a ropui takzet. Mahse, Premier League meuh hmachhawn tur chuan a la tawk lo a ni," a ti a, transfer bazar-ah chet an mamawh thu a sawi.