Samuel Umtiti-a'n Lille a zawm

Barcelona-in an chhuah zalen hnuah defender Samuel Umtiti pawhin club a nei ve leh ta a, kum hnih chhung khel turin French club Lille chu a zawm.

Kum 29 mi defender hian beiseina sang tak nen Barca pan mah se tun hnai kum li chhung chu hliam vangin a talbuai deuh reng a, season hmasa kha Serie A club Lecce-ah loan-in hun a hmang a ni.

Lyon aṭanga inzir chhuak Umtiti chuan, "France-a ka kir hian ka rilruah chuan Lyon a awm hmasa ber a, mahse, a tawpah chuan min duhtu club lam pan ka thlang ta a ni," a ti.

France tana vawi 31 inlana goal li khungtu Umtiti hian World Cup 2018-ah khan France hi champion nomawi a chawipui a, semifinal-a Belgium an hnehna inkhelah chakna goal a khung hial.

Mahse, kum 2019 hnuah Umtiti hi ram tan koh a ni leh tawh lo a, French defender chuan an ram jersey chu hak leh ngei a tum thu a sawi chhuak.

Umtiti chuan, "France team-ah ka lo tel tawh a, tawnhriat ropui leh hun hlimawm tak a ni. Khatiang ang boruak kha tawn leh ka duh a ni," a ti a, Lille-ah a hming chher a tum hle.

Cameroon-a piang defender hian kum 2016 khan Lyon aṭangin Barca a pan a, euro maktaduai 25 man niin, a hun laia player man ngaihtuahin player man to tak a ni.

Catalan club tan hian match 133 khela goal hnih khungin, La Liga (2), Copa del Rey (3) leh Supercopa de Espana (2) nomawi a chawi a, Champions League nomawi erawh a chawi ta lo.